Kuthnathawktuten an thawh rah
man manin an hralh thei lo mek
– Leader of opposition
Sawrkarin thlai rate a thunun tlat avangin kuthnathawktuten man manin an thawh rah an hralh thei lo a, loh theih lohna avangin man tlawmin an pek phah tih MNF vice president Lalchhandama Ralte chuan a sawi.
Tuivawl bialtu MLA Lalchhandama Ralte hian a bial a tlawhkual mek a. Amah lo dawngsawngtu MNF party mite nen an inkawmnaah, a bial chu hmunphiah tamna hmun a ni a. Tunah hian an dahkhawm ruih tawh a, a leitu tur sawrkar a la che eih si loa, chhungkaw khawsak harsa tak takten an fate school admission atan sum an mamawh si a, loh theih lohna avangin a theihna apiangah man tlawmtein an pek phah niin a sawi.
Sawrkarin market a thunun sak a, kuthnathawktute thawh rah pawh man mana an hralh thei lo chu thinrimthlak a tih thu a sawi a. VC/LC inthlan zawh lama thlai thar lei an tum chauh chuan ngaih a titha lo tih a sawi.
Kuthnathawktute an rum mek lai hian an thlavang hauh sak nia insawi sawrkar khawiah nge a awm, tia zawtin, “Sawrkar inrawlh thuk avangin chhungkua ei bar zawnna a chhia a. ZPM sawrkar hmaa hmunphiah kg khat Rs.30 chuanga lei thinte, a ro kg-ah Rs. 100 chuanga an hralh theih laiin, tunah sum hlutna a tlakhniam hle tawh hnuah pawh a ro kg khat Rs. 60 tea an han deal hi a thinrimthlak a ni,” Lalchhandama Ralte hian a ti.
ZPM chu sawi loh dan hlirin awm nia sawiin, an sawrkar chuan sum an puk ve loh tur thu an sawi laiin, tunah an puk tam tawh a; an sawrkar chuan minister-ten car pakhat bak kawl lo tura insawi khan pahnih/pathum an kawl a; designation plate tar ve dawn lo anga insawiin a tar lian hlei hlei an ni leh si tih MNF hruaitu hian a sawi. Bangla chei pawh ti ve lo tura insawiin a cheimawi hlei hlei an ni leh tih sawiin, “Kan ti ve lo ang, tih kha sawi sawi lo se, sawrkar facilities chu an nihnain a keng a, an la ve mai tur kha a ni a, an thusawi vekin sawi loh ang zelin a awm tir a ni,” a ti.
Kuthnathawktuten an thawh rah man manin an hralh thei lo mek – Leader of opposition
