Kuwait Emir thi, Emir thar ruat zui nghal

Kuwait ruling emir kum 86-a upa Sheikh Nawaf Al Ahmad Al Sabah chu December 16 khan oil lama hausa ram chhung politics chinfel tuma nasa taka hma a lak laiin a thi.
Kuwait crown prince Sheikh Meshal al-Amhad al-Jaber Al-Sabah chu oil lama hausa tak emir thar atan puan a nih thu state telvision chuan a puang zui nghal a.
“Kuwait Cabinet chuan crown prince, his highness Sheikh Mesahl chu Kuwait emir thar atan a puang” tiin sawi a ni.
November thla tawp lam khan Sheikh Nawaf chu a chhan sawi chuang lovin damdawi In panpui a nih thu puan a ni a. State-run news chuan March 2021 khan United States-ah inentirin a kal tawh tiin a puang bawk. Kuwait leader te hriselna hi puanchhuah mai mai a ni ngai lo.
Sheikh Nawaf hi oil hmanga Kuwait changkan hmaa piang tawh niin kum lamah a upa tawh a. Gulf Arab ram dang ang bawkin la thalai zawk hnenah thuneihna hlan tura nawrna a tawng reng sa tawh a.
|henawm Saudi Arabia-ah pawh kum 87-a upa King Salman chuan ram enkawlna chu a fapa kum 38 leka upa Crown Prince Mohammed bin Salman hnenah a tam zawk chu a hlan tawh tia sawi a ni.
Sheikh Nawaf hi kum 2020 khan Sheikh Sabah Al Ahmad Al Sabah thih hnuah emir atana hlankai chauh a ni a. Shekh Sabhah kha diplomacy leh peacemaking lama sulhnu ngah niin an sun nasa hle a ni.
Sheikh Nawaf hi a hmain Interior leh Defence Minister ni tawhin kum upa tak tawha emir a dah a nih hnuah pawh a dahrei rin loh sa a ni a. Kum 1752-a Al Basah rorelna Kuwaita-a a awm hnuah Sheikh Nawaf chu rorel rei lo ber pathumna a ni.
Kum 2021 khan Sheikh Nawaf chuan amnesty decree siamin Kuwaiti dissidents tam tak te chu an hremna tihniam leh ngaidamin a chhuah zalen hlawm a. Chuvang chuan fak a hlawh hle thung.
Kuwait hi Gulf ram zinga parliament zalen ber anga ngaih niin lungawilo pawh an tlemna ber tia sawi a ni a. A hun laiin Gulf Cooperation Council states Qatar, Saudi Arabia leh United Arab Emirates te telna chuan kum eng emawti chhung Doha an kawmserh hnuah inremna an siam thei bawk a.
Kuwait hi ram lian lo tak mipui maktaduai 4.2 chauh awmna a ni chungin khawvel huapin oil reserve nei ngah ber ram parukna a ni thung.
Kum 1991 Gulf War atang khan US thian tha bur niin Kuwait-ah hian American sipai 13,500 chuang an awm a, Middle East a US Army in headquarter a neihna hmun a ni bawk.