Kvitova tan ‘Wimby’ goodbye hun a thleng ve ta…
Kum 2011 leh 2014-a Wimbledon champion ngainatawm tak Petra Kvitova khan Thawhlehniah a vawi thumna atana champion leh tumin All England Club-ah first round match a khel a, 10th seed Emma Navarro lakah chiang zeta tlawmin, 6-3 6-1-a a chaklohna kha Wimbledon-a a match hnu hnungber a ni ve ta!
Kum 35 mi Czech hian nikum khan fapa hringin, nau neih chawlh avangin nikum Championships-ah a inlan thei lo a; kumin February thla mai khan tour-ah a kirleh thei chauh a; nu a nih hnua tennis inelna a hmachhawn leh hnuin match kuaah vawi khat chiah a chak a, thisen a pal meuh chuan a tha a tum ve ta tih pawmin thla hmasa mai khan kumin September thla US Open a khelh zawh ruala professional tennis a chawlhsan ve tawh tur thu a puang a, tun hi Wimbledon-a a inlan tawpna a ni ve ta a ni.
American Navarro laka a tlawm hnu court chhunga a thusawi chuan mi rilru a khawih hle a, amah pawhin a mittui a dang zo lo a, Court One mipuite pawhin tour-a player duhawmberte zinga mi hi ‘standing ovation’ nen an thlahliam.
Petra Kvitova hian vawi hnih ngawt a champion tawhna leh kum 2010 – 2015 chhunga quarter-final chin tal a thlen chiahna grass-court grand slam tournament hi ‘Wimby’ tiin a ko duat a, a tan chuan ‘special place’ a nih thu hnukulh teuhin a sawi.
“Wimbledon hi ka ngai dawn a, tennis leh ka fan-te pawh ka ngai takzet dawn a, mahse, ka hringnunah bung thar ka chuankai a ngai ve ta si a, member ni chung tala lo kir leh hlan hi ka nghakhlel hle dawn a ni,” tiin box lama a chhungte leh coach thenkhat thu lam hawi chungin an chungah lawmthu a sawi a, “A hmasaber atan ka pa ni se, a tawp berah ka pasal,” tiin.
A chhungte chungchang hi sap tawnga sawi loin Czech-in a sawi a, a hnukulh a insum zo lo.
Kvitova hian 2011 Wimbledon singles title a lakna kawng final-ah Maria Sharapova a lo hneh tawh a ni.
Moravian khuaa piang leh seilian Kvitova hi a bultanna lamah clay court-a inkhel thin niin, grass hi a tih vak loh lam a ni a, chuvangin All England Club-a a chhuah hmasak vawi hnihah pawh first round a paltlang zo lo ve ve nghe nghe.
Chu chu a hun hmasa lam ni mah se a ‘big serve’ leh a ‘baseline shot’ pui tak avangin grass leilung chuan a theihna a upbet kumkhua zo lo tawp a, tarlan tawh angin, kum 2010 atanga 2015 chhung khan Wimbledon-ah last eight chin a thleng zat zat a, kum 2011 leh 2014-ah phei chuan trophy a chawi nghe nghe.
Kum 2016 December thla khan an in rawk tum misual tu tih hriat loh chemte keng nen innangchigin, a invenna lamah a kutphah chu chemte hriamin na takin a tai thler a, a nerve a khawih avangin racquet pawh hum tha thei tawh lo leh a career pawh tawp zui mai thei dinhmunah a ding a, khatih lai khan doctor-te thlir dan chuan inelna a hmachhawn leh theihna chance kha 10% chauh a ni a, mahse, thla nga hnuah ‘competion’ hmachhawn turin a kir leh thei!
Chu mi hnuah erawh a hliam tawrh hma kha a pha ta lo a, All England Club lamah pawh fourth round a pel zo ta hlek lo a; 2019 Australian Open-ah erawh Grand Slam final a han thleng leh zuai a, major title erawh a lak belh zo ta chuang lo.
Kumin hian ranking lama a din-hmunin main draw pha lo mah se wildcard hmangin a tournament ngainat ber Wimbledon-ah a inlan leh a, first round paltlang zo loin a kalbo hlen ve dawn ta a ni.
“He hmun hi hriatrengna duhawm ber ber ka hnutchhiahna hmun a ni. Wimbledon-a champion hi ka beisei chhin ngai lo a, mahse, tum hnih ngawt trophy ka chawi a, ka tan chuan he hmun hi a special ngawih ngawih a ni.”
Kvitova tan ‘Wimby’ goodbye hun a thleng ve ta..
