Kyiv khawpuiah khaw ên laiin SBU agent kap hlum

Kyiv khawpuiah khaw ên laiin SBU agent kap hlum
Kyiv khawpuiah khaw ên laiin Ukrainian intelligence officer lawk kah hlum a ni tih thuneituten an sawi.
Tual chhunga Security Service of Ukraine (SBU) agent hi lirthei hunna hmunah mi tu tih hriat lohvin vawi tam tak a kap a, a tlanchhe zui nghal a. Thil thleng video hi social media-ah nasa taka vawrh darh a ni.
Spy agency hian tu nge thi hi an sawi lo va, Ukrainian chanchinbute erawh chuan Colonel Ivan Voronych niin an tar lang hlawm.
SBU hi an ram chhung himna vawngtu leh chutiang lo bei lettu an ni a. Russia-in kum 2022-a an ram a rûn hnuah erawh Russia ram ril zawka mi thah leh beihnaah an inhnamhnawih thuk hle.
Ukraine-a security services chuan December, 2024-a Russian Gen Igor Kirillov-a thah pawh kha an tih a ni tih an lo puang tawh.
Kumin kum tirah pawh khan Moscow-ah car bomb hmangin Gen Yaroslav Moskalik-a thah a ni a, Kremlin chuan Kyiv tihah puh mah se Ukraine-a security services hian an tihah an chhal lo thung.
SBU leh Kyiv Police chuan agent thah chhan hi an la hre lo va. Police chuan tunge a thattu hriat tumin an bawhzui nghal a, man ngei an tum.
CCTV footage-a a lan dan chuan mipa jeans leh t-shirt thim lam hain Holosiivskyi district chhim lama building chu Ningani zing dar 09:00 (India-a chawhma dar 11:30) khan a chhuahsan a. A bula car chu plastic bag leh holdall kenga a pan laiin mipa dang tlan lai a lang bawk.
Online news site Ukrainska Pravda chuan a kaptu hian pistol hmangin SBU officer hi vawi nga a kap niin an tar lang.
Ramriah pawh indona awm zelin Russian sipaite chuan Ukraine khawthlangah hma sawn zelin Russia-a Kursk region pawh nikum nipuia Ukrainian sipaiten an lak hnuah an chhuhsak leh deuh vek tawh.
Russia hian Ukrainian ram hmun ngaa thena hmun khat an thunun mek tawh a, heng zingah hian kum 2014-a Crimean peninsula chhim lam a luah pawh a tel.