Europe club inelna lian ber Champions League title a lakpui zawh loh hnua Paris St-Germain chhuahsan ta Kylian Mbappe chuan a vawikhatna’n Pathianni zan khan a club thar Real Madrid tan La Liga match a khel a, a league debut-a goal a khung zawh loh mai piahlamah Bernabeu club a chakpui zo lo a, Mallorca mualah 1-1 draw an hlawhchhuak thei hram!
France captain hian karliamta Nilaini khan a club thar tana inelna a hmachhawn vawikhatnaah goal thun nghalin, Europe club competition khuhhawnna inkhel Uefa Super Cup-ah Carlo Ancelotti team chu Italian club Atalanta lakah sihnih faiin a chakpui a, mahse, Spanish top flight-a a inlan vawikhatnaah beisei angin a langsar zo ta rih lo.
Son Moix Stadium, Palma de Mallorca inkhelah chak tura rinkai zawk Real-in hma an hruai hmasa ngei a, tan atanga minute 13-na lekah Brazilian forward Rodrygo chuan a chipui Vinicius Junior siamsak tangin mikhual hmahruaina goal a thun mai a, half time-ah Madrid atanga fehchhuak team hian 1-0-in hma an hruai.
Second half tir lam minute 53-ah Dani Rodríguez chhawpsak atangin Vedat Muriqi chuan mualneitu team siphurh sutna goal a tauhlut a, goal dangluhbelh loin champion lai Real Madrid-in an title kawl lai humhim tura an chetchhuah vawikhatnaah point hnih an hloh ta phawt.
Son Moix-ah khan Real ‘New Galacticos’ an tih mai kan hmu a, star langsar Mbappe, Jude Bellingham leh Vinicius Jr. han tih angte kha an tumpui tawh phawt tana hming tihbaiawm a ni lo thei lo ang a, bul pawh an tan fuh hmasa zawk reng a, mahse, si an phurh hnuah mualneitu team khan counter-attack hmangin ha hriam zui lo zet Bernabeu club kha an rumthaih chamchi a, ball pawh an chang tam zawk mah a, tlarhma lamah an rilru a mang leh thin mai pawh a!
Hun pekbelh minute sarihna a kal mek laiin Madrid defender Ferland Mendy chu Muriqi laka a foul avangin hnawhchhuah a ni a, mahse, a tam zawk an nihna hi mualneitu team-in an chhawr hman ta chiah lo a ni.
PSG record goalscorer leh vawiruk ngawt Ligue 1 Golden Boot dawng tawh Mbappe pawh khan goal thun theihna hun remchang nei nual mah se tum khat chu goal ban sirah a petchhuak a, vawikhat dang leh chu Mallorca keeper Dominik Greif chuan a ke hmangin a dansak hram a ni.
Tun kha Monaco lama a career a tan hnuah kum 25-a upa World Cup winner-in France ram pawn lama league game a khelh leh vawikhatna niin, Son Moix stadium-ah ropui nghal vut vut lo mah se Spanish top flight-a player hmuh nawmberte zinga mi a ni chho ngei tura ngaih a ni!
Real goalkeeper Thibaut Courtois khan sikhat faia hma an hruai laiin vawithum ngawt ‘save’ tha tak tak a nei a, mahse, second half tir lama Muriqi ball tauh kawh lutuk kha chu a dang zo ta bik lo a ni.
Inrinni khan Real elpui lian Barca chuan an player tha engemawzat chhawr thei lo chungin Valencia mualah 2-1 hnehna nen season bul an tan thei bik!
La Liga debut-a vul zo lo Mbappe
