La Liga lamah Barca an fal zual zel
Inrinni zanah sihnih faia an mikhual Osasuna hneh lehin Barcelona chu Spanish La Liga table-a anmahni hnaihbertu Real Madrid lakah point sarih zetin an sang ta a, nizan esult tarlan hman lohah Real hian Alaves muala point an hmuh zawh loh phei chuan Catalan-ho chan hi a tha lehzual ang.
Spotify Camp Nou chhunga fans 42,058 pungkhawm hmaah mualneitu team khan goal an khung thuai thei bik lo a, second half chawhnu lama Raphinha goal hnih tihluh an chakpui ta a ni.
Ti hian, season kal laia La Liga game 17 an khelh tawh atangin Barcelona hian goal 49 zet an khawl tling tawh a, tlarhma lama harsatna tawk han tih rual chu an ni lo!
Tarlan tak angin, an kawtkaiah defending champion khan goal khung an harsat rei hle a, minute 70-a Brazilian forward goal hmasa zawk an hmuh hma khan shot vawi 21 zet nei hman mah se an hun tha neih goal-ah an chanter zo lo fai thak a; minute 86-a Rapinha goal hnihna a luh leh tak hnu kha chuan rilru helhkham em em nei loin home team khan an khel zui thei ta niin a lang!
Chawlhkar sarih liamta kha chuan El Clasico-ah 2-1-a Real Madrid hneh loin Barca khan table-ah point nga ngawtin hmahruaitu Real Madrid an thlau hman a; chu mi hnuah a zawnin league-ah match sarih chhung tehreng an chak tling ta a, table lerah Hansi Flick-a team an insawhnghet ta viau mai.
Inkhel thunun nghet hmiah Barcelona khan hun pumin ball 80% an chan bakah shot vawi 24 an nei tling a; an mikhual Osasuna khan home team goal lam hawiin tum thum chu ball an thawnluh ve kha!
Mikhual team kha hnehna chan tuma Nou Camp lut niin an lang lo a, a tha bera draw hlawhchhuah kha an tum ber leh an game plan nia a lan tlat avangin an defensive line-ah pawh player panga an tlar thawt a; chutah an goalkeeper Sergio Herrera chetthat zan a lo ni lehzel a, ani khan vawi duai lo an lama goal lut tur dangin Barca tlarhma luahtute a tibeidawng rei fu!
Minute 23-ah Catalan team khan hmahruaina goal khung ngeia an inngaih laiin Marcus Rashford cross atanga Ferran Torres-a tauhluh khan rei ngial VAR endikna a hmachhawn hnuah kha goal intintuah chhoh laia offside an awm avangin hnawl a ni.
Chawlhlawk dawnah rawlthar Lamine Yamal-a ball chhawpsak atangin striker Torres chuan overhead kick hmangin goal a zawng a, goal ban sirah a thlawh chhuak hlauh.
Second half-a Raphinha goal hnih hmangin mualneitu team-in an kawtkaiah point thum an thawkchhuak zui ta tho a ni.
La Liga lamah Barca an fal zual zel
