Ladakh-ah dil khang chunga half marathon tlanin record an siam
Ladakh chuan hmun vawt lutuk, tui pawh a khal zelna, temperature pawh zero hnuailam, feet 13,862 a sang, Pangong Tso-ah half marathon (km 21) tlan hlawhtling takin an huaihawt a, Guinness World Records chuan khawvela frozen lake half marathon sâng berah a puang. Pangong Lake hi India leh China inrina a awm niin, square km 700 vel zet a ni a, thlasik lai chuan a temperature pawh minus 30 degree Celsius te a ni thin a, hei vang hian he dil hi a khang vek thin a ni.
He half marathon (km 21) dil khang chunga tlan hi Lukung atanga tanin, Maan khuaah a tawp a, darkar 4 chhungin he half marathon a tlan mi 75 te chuan an tlan chhuak vek hman a, tumah chesual leh inhliam awm lovin an tlan chhuak thei vek niin Leh District Development Commissioner Shrikant Balasaheb Suse chuan a tarlang.
He dil khang chunga half marathon tlan hi a hmingah ‘Last Run’ an ti a. Khawvel sik leh sa danglam nasa tak karah Himalaya venhim a pawimawhna te mi tam zawkin an hriat a an ngaihvel lehzual theih nana an buatsaih niin, a buatsaihtute hi Adventure Sports Foundation of Ladakh leh Ladakh Autonomous Hill Development Council, Leh, Tourism Department, Ladakh leh Leh district administration te thawkhoin an buatsaih a ni a, tun hi Pangong frozen lake marathon an neih vawi khatna a ni a, Guinness World Record an siam ta nghal a ni.
Ladakh-ah dil khang chunga half marathon tlanin record an siam
