LADC-a buaina court-in
la ngaihtuah zui rih dawn
Lai Autonomous District Council-a sawrkarna siam tum chungchanga inkhinna chu Nilaini khan Gauhati High Court chuan ngaihtuahin, thutlukna a siam loa, July 23-a ngaihtuah zawm tura dah a ni.
LADC-ah hian ZPM sawrkar dinnaa chief executive member V Zirsanga chuan CEM atanga paih a nihnaah dan palzutna a awm nia hria in, High Court-ah a thlen a; Gauhati High Court Aizawl Bench chuan kumin May 15, June 10 leh July 16 khan a ngaihtuah a, thutlukna a la siam lo.
High Court-ah thu kal lai a awm avang hian LADC-ah sawrkar mumal a kal thei loa, tuna CEM N Zangura pawh hna thawk thei loin dah mek a ni.
LADC-ah hian ZPM MDC V Zirsanga hi kumin February 27 khan CEM atan lakluh a ni a, a kaihhruai LADC a ZPM sawrkar chuan Budget Session pawh kumin April 17 -22 chhung khan neiin, budget an pass hman a, budget erawh dan kalha pass nia sawiin, ADC-a thu tawp neitu larsap chuan a pawm lo a ni.
Hemi hnu hian BJP leh MNF din United Democratic Alliance chuan LADC-ah sawrkarna an siam thei tih larsap hi an hrilh a, an hruaitu M.Kawnpui bialtu MDC N Zangura chu kumin May 8 khan CEM atan lakluh a ni.
Dan pangngai ang chuan LADC ah hian kumin kumtawp hian inthlanpui neih a ni ang.
LADC-a buaina court-inla ngaihtuah zui rih dawn
