Lai Autonomous District Council-ah Congress nen an thawh dun theih avangin an lawm tih MNF hruaitu Dr R Lalthangliana chuan a sawi.
Thawhlehni khan MNF senior vice president Dr R Lalthangliana hoin MNF District Hqrs Lawngtlaiah party hruaite an thukhawm a. MNF hruaitu chuan, MP inthlan result-in MNF mi leh sa tumah tihnual lo se a duh tih sawiin, “Keini pawh 2019 MP inthlanah khan party zawng zawngin min beih rawn a, vote tam takin kan chak a, tuna ZPM MLA neih zat hi MLA kan nei ve tho. Tun tumah khan Congress nen thawk ho ta ila, vote sing tel fein ZPM MP candidate kha kan hneh dawn a ni,” a ti.
Tuna LADC-a MDC rinawm taka awmte chu a fak tih a sawi a. Congress nen an thawhho theih avangin lawmthu a sawi.
LADC by election-ah an tling a nih chuan MNF chuan rinawm takin an thutiam an hlen anga, sawrkar nghet leh tha tak an siam thei dawn a ni, tiin, Lawngtlai mipui chu MNF candidate vote vek turin a sawm tih Dr R Lalthangliana hian a sawi.
MNF MLA Lalrintluanga Sailo pawhin LADC by election-ah Congress nen an thawhho avanga chak ngei an inrin thu a sawi a. State-ah sawrkar rih lo mah se, reiloteah an ding chhuak leh dawn tih a sawi. “ZPM hi an inthurual lo hle a, an sawi loh ang hlirin an awm bawk. Tuna MNF MLA 10-te hian kum 2028-ah a lo berah MLA 27 aia tlem lo kan hring chhuak dawn a ni,” a ti.
LADC-a thawhhonaah kan lawm – Dr R Lalthangliana
