LADC-ah opposition kan thlang – Lalchhandama Ralte

LADC-ah opposition kan thlang
– Lalchhandama Ralte
Lai Autonomous District Council inthlan neih zawh takah Congress nen sawrkarna an siam dawn emaw an tih laiin, Congress hian ZPM an lo biak tel tho avangin MNF chuan opposition-a awm an pawi ti lo ta mai tih MNF hruaitu Lalchhandama Ralte chuan a sawi.
Zirtawpnia Mizo Hnam Run-a inkhawmah MNF vice president Lalchhandama Ralte chuan, LADC-ah sawrkarna siam thei party mal an awm loh avangin an lu a hai hle a. Seat la tam ber an nih angin MNF kaihhruai sawrkar siampui turin INC nen an indawr nghal a, ngaih tha taka an awm laiin, a tuk lawkah INC leh ZPM an lo indawr reng avangin thawhhona an titawp a. INC nen an thawhhona tihtawp chhan nia an puhnaah MNF party aiawha thutawp siam theitute an tel ve lo tih a sawi.
“MNF party hotute chuan lungrual takin, tun dinhmunah chuan opposition-ah awm mai kan thlang a. INC leh ZPM-in sawrkar an siam mai tura kan ngai tawh laiin, tunah ZPM Political Affairs Committee lamin INC leh ZPM sawrkar siam an remti lo, tih thu kan hriat lehzel avangin sawrkarna siamtu tur thu chiang a awm rih lo,” a ti.
Lawngtlai district bialtu a nih angin LADC inthlanah Lawngtlai District MNF hotuten seat 20 chuh tura rawtna an siam dan leh a bak seat 5 pawh Headquarter hotute remtihna la in, a hmuna awmte ruahmanna ang zela kal an ni tih a sawi a. MNF sawrkar laiin LADC MDC seat 25 awmah kum 2020 khan seat 20 an la a, ZPM sawrkarah ZPM chuan seat 6 chauh la in pathumna an ni a. Hei hian ZPM chu mipuiin an hnawl mek tih a lan thu a sawi.
Dampa by election-a an tanrual ang bawkin, LADC inthlanpuiah an thawhhona a tha a. An thawhlawm tlingkhawm pawhin inthlan senso a daih vek, tiin, hei hi an tanrual zia a tichiang tih a sawi bawk.
LADC term hmasaah sawrkarna fawng chelhtu an inthlak chhen avangin tun tumah chuan MNF-in sawrkar ngelnghet siam turin manifesto tha tak an siam a. NGO-ten theihtawp an chhuah bawk avangin an politics boruak a danglam ta viau tih a sawi a ni.
“Kan politics vir vel thlirin, Dampa bialah mipuiin ZPM an hnawl a, LADC-ah pawh kum hnih chauha upa sawrkar an hnawl leh a. Arsi a eng mek tih a lang. Inthlan awm leh turah MNF kan sawrkar dawn tih chiang takin a lang,” a ti.