LADC buainaa bultumtu
chief minister leh larsap
– Lai DCC
Lai Autonomous District Council-a sawrkar nghet awm thei loh avanga Council thawktute leh a huamchhung mipuiin an tuar hle tih Congress party chuan an sawi a. He buainaa bul tumtu chu chief minister leh larsap niin an sawi.
Lai District Congress Committee thuchhuak chuan, mahni sahmim puarna tur leh lalna duh luat avanga Lai ADC mipui leh party candidate an nih theihna atana sponsor-tu party pawh zah zo loa, MNF MDC thenkhatin ZPM leh BJP an zawm avanga LADC mipui tawrhna an thlen chu zahthlak a tih thu a sawi.
Chief minister Pu Lalduhoma chu LADC buainaa a bul tumtu ber a ni, tiin, MNF MDC-te thlema thu tam tak tiamtu pawh Pu Lalduhoma a ni tih a sawi. ‘Pu Lalduhoma leh a kaihhruai ZPM party hi tuten emaw BJP sum an hman avanga BJP hlau em em anga an sawi kha, LADC chunga thil thlen dan ngaihtuah hian a dik niin kan ngai,’ a ti.
Mizoram larsap VK Singh chu State BJP hotu tute emaw thusawi ni awm tak anga ngaih theih veka order siama lehkha chhuahah Lai DCC hian puhin, ‘LADC inrelbawlna dan leh dun zahpah loa Constitution venghim tur bera ruatin LADC CCB Rules a palzut hi larsap ni tlakah kan ngai loa, amah vanga LADC thawktu leh mipuiin harsatna nasa an tawk hi a rang lama a sutkian dan zawng turin kan phut a ni,’ a ti.
Hetihlai vek hian, Mizoram sawrkara nodal department DC&MA kaltlang loa Governor Secretariat atanga LADC lama lehkha an chhuah hian, DC&MA minister Pu C Lalsawivunga leh chief minister-ten LADC an ngaihsak loh zia leh tih takzeta an enkawl loh zia a tichianga an hriat thu a sawi bawk.
BJP sum an hman vanga ZPM sawrkarin larsap an hlauh phah nge tih zawtin, tuna LADC dinhmun chu ngaihsak nise, pumpelhin mipui harsatna sutkian theih a ni, tiin, heng thil hi ZPM sawrkar nep vanga thleng a ni tih a sawi.
MLA Pu C Ngunlianchunga’n LADC thawktute hlawh lak a nih theihnana theihtawp chhuaha hma a lak a vangin thawktuten hlawh an la thei ta chu lawmawm an tih thu Lai DCC hian a sawi a ni.
LADC buainaa bultumtu chief minister leh larsap – Lai DCC
