11th Lai Autonomous District Council (LADC) a chief executive member atan C Lalmuanthanga chu Thawhlehni khan Lawngtlai district bawrhsap Cheemala Siva Gopal Reddy chuan LADC Hall Lawngtlaiah rinawmna thu tiamtirin a la lut.
Chief executive member (CEM) lakluh inkhawm kaihruaitu LADC-a executive secretary K Lalthanzara chuan LADC (Constitution, Conduct of Business etc.) Rules 2010 rule 21 sub-rule (4) tlawhchhana LADC CEM atana C Lalmuanthanga ruatna sawrkar hriattirna a chhiar chhuak a. Hemi hnu hian bawrhsap chuan CEM hi a lalut a ni.
CEM chuan a kaihhruai sawrkar a pian theih nana hma latute chungah lawmthu a sawi a. Mizoram larsap leh chief minister hmalakna fakawm a tih thu a sawi. LADC-ah huapzo, mipui sawrkar din leh langtlang taka sawrkar kalpui a tum tih sawiin, LADC budget ringawt chu innghahna tham a nih loh avangin hmasawnna huamzau zawk dap chhuak tura tan lak chu a ngaipawimawh dawn tih a sawi.
CEM thar hian a sawrkar – United Legislature Party deputy leader atan Lungtian bialtu MDC Sanghuliana Mualchin a ruat tih a puang nghal a. Lakluh inkhawmah hian MLA pathum – C Ngunlianchunga, Robert Romawia Royte leh Dr Lorrain Lalpekliana Chinzah bakah MDC-te, state leh LADC-a official-te, political party hruaitute, kohhran leh NGO hruaitute leh chanchinbumite an tel.
LADC CEM thar lalut
![](https://theaizawlpost.org/wp-content/uploads/Clipboard01-952.jpg)