LADC sawrkar din dana mipui mit
tikham a awm chuan hma lak tum
Lai Autonomous District Council-a sawrkar ngelnghet a awm theihnan Lawngtlai district-a tlawmngai pawl intelkhawm chuan hma an la a, sawrkar indin dan emaw sawrkar kal danah emaw mipui mit tikham zawnga chetna a awm chuan hma an la dawn tih an sawi.
NGO Coordination Committee Lawngtlai District hian Inrinni khan LADC inthlanpui neiha candidate ho kokhawmin candidate tling an awm hnu, sawrkar a pian hnua tha an tih leh an duh dan an hrilh. Committee chairman, Central YLA president FLalrothanga chuan, December 9-ah inthlana vote tla chhiar a ni dawn a, reilote ah sawrkar thar a piang dawn a, party mala sawrkar emaw thawhdunna leh thawhhona atanga sawrkar siam emaw pawh nise, ram mipuiin sawrkar nghelnghet an mamawh tih a sawi a. Inthlan result hriat hma, tute nge MDC tih hriat a nih hma in candidate-ten ram leh mipui dinhmun ngun taka thlir turin a ngen tih a sawi.
Sawrkar chuan hnam ziarang, tawng leh culture vawnhim leh hmasawnna atana hma lak chu an tih ngei turah an ngai tih a sawi a. Sawrkara chanvo pawimawh zual – chief executive member, chairman, deputy chairman leh department pawimawh zual, ram leh hnam hnuk khawih nasa bik – Education, Forest, Revenue leh Art & Culture chu Autonomous District Council hming put chhan enkawlna hnuaia a awm chu an duh ber tih a sawi a ni.
NGO Coordination Committee leh candidate ho inkawmnaah hian sawrkar indin dan emaw sawrkar kal danah emaw mipui mit tikham zawnga chetna a awm a nih chuan NGO Coordination Committee-in hma a lak tur thu sawi a ni bawk.
December 3-a vote thlak LADC inthlanpuiah hian ZPM chuan bial awm zawng zawng bial 25-ah candidate neiin, MNF-in 20, Congress-in 14, BJP-in 10 an nei a; independent candidate 11 nen candidate 80 an awm.
LADC sawrkar din dana mipui mit tikham a awm chuan hma lak tum
