Lai Autonomous District Council-a chief executive member V Zirsanga kaihhruai sawrkar chu August 14 hian fiah a ni dawn.
District Council & Minority Affairs department chuan dan tlawhchhana larsap duh dan angin CEM V Zirsanga kaihhruai sawrkar chu vote of confidence hmachhawn turin LAD chairman chu August 14 chhun dar 12.00 ah thutkhawm ko turin a hriattir.
LADC-a sawrkarna siam tura buaina awm hi High Court-ah luhpui a ni a. Gauhati High Court Aizawl Bench chuan kumin August 8 khan thutlukna siamin, Mizoram larsap-in LADC CEM atana N Zangura a ruatna chu hnawlin, CEM atanga chawlhtir tum V Zirsanga chu CEM ni zui turin a ti a. V Zirsanga kaihhruai LADC sawrkar chu court order chhuah atanga chawlhkar hnih chhunga fiah (floor test) turin a ti a ni.
CEM atanga chawlhtir tum V Zirsanga hi ZPM niin, CEM thar tura ruat N Zangura hi BJP a ni a. A ni hi MNF-in an thlawp a ni.
LADC sawrkar fiah dawn
