Lai Autonomous District Council huamchhunga village council inthlanpuiah ZPM chuan seat an la tam ber a, sawrkarna siam theihna pawh an ngah ber.
LADC hnuaia VC inthlanpui hi June 27 khan neiin, vote thlak zawh hun a tawp velah chhiar nghal a ni a. June 28 khan result hi tihchhuah kim nghal a ni.
LADC-a VC 99 awm zingah Hmawngbuchhuah VC-ah inthlan chuh tura endikna paltlang zo an awm loh avangin inthlan buatsaih a ni lo a. VC 98-ah inthlanpui hi neiin, VC 98-ah hian a duh apiangin an chuh theih general seat 492 leh hmeichhe tana hauh bik reserved seat 98, a vaiin seat 590 a awm. Inthlan chuhtu candidate hi 1511 niin, BJP candidate 24; INC candidate 300; MNF candidate 438; ZPM candidate 549 leh independent candidate 200 an awm a ni.
LADC VC inthlanpui 2024-ah hian ZPM-in seat 246 (general 203 leh reserved 43) la in, VC 38-ah hnehna an chang a; MNF-in seat 192 (general 162 leh reserved 30) la in, VC 25-ah hnehna an chang. INC-in seat 102 (general 89 leh reserved 13) la in, VC 12-ah hnehna an chang a; BJP-in seat 7 (general vek) la in, VC siamna an nei loa; independent candidate-ten seat 43 (general 31 leh reserved 12) la in, VC khata seat zatve aia tam lakna VC 1 an nei. Party mala VC din thei (majority) awm lohna VC 22 a awm a ni.
LADC VC inthlanpuiah ZPM-in a chang tam ber
