Laitel chi thar hmuchhuaktu
zingah MZU mithiamte an tel
India ram atangin ram laitel hmuhchhuah thar a ni a, a hmuchhuaktute hi Mizoram University mithiamte kaihhruai an ni.
MZU Zoology department head Prof HT Lalremsanga leh a hnuaia research scholar Dr Ht Decemson chuan MV Lomonosov State University Russia-a scientist leh Germany-a Max Planck University-a an thawhpuite nen Himalaya tlangdung, Uttarakhand state chhunga Chopta atangin ram laitel (skink) chi thar an hmuchhuak.
Chopta-a ram laitel DNA leh pianphung hi MZU-a Developmental Biology & Herpetology Laboratory-ah Prof HT Lalremsanga leh a thawhpuite hian an zirchiang a, species thar an hmuh chhuah thu hi nemnghetin, a hmingah ‘Ablepharus flammeus’ an vuah. An thil hmuh chhuah chungchang hi German scientific journal – Salamandra-ah kumin October 30 khan tihchhuah a ni.
Laitel chi thar an hmuh chhuah mit hi rul mit anga mit vun nei lo leh mit khap ve thei lo an nih avangin ‘snake-eyed skinks’ tia hriat lar an ni tih Prof HT Lalremsanga hian a sawi a. Khawvel huap chuan Europe chhim chhak atanga Asia chhaklamah chauh awmin, species 19 hmuh chhuah an ni tawh a, India ramah chuan tuna an hmuh nen hian species 7 hriat an ni tawh tih a sawi.
Tuna an hmuhchhuah thar hi tlangsang leh chhengchhe tak, metre 2500 – 3300 chunglam rama awm an ni tih a sawi a. A pa nghawng leh dul vel rawng hi meialh sen a an avangin a scientific name-ah Ablepharus flammeus an ti a, a Saptawng hmingah chuan Fire- Bellied Ground Skink, a Mizo hmingah Laiteldulsen tiin an vuah tih a sawi. An laitel hmuh chhuah thar hi an biology hriat mumal a la awm loa, IUCN (International Union for Conservation of Nature) criteria hnuaiah la hriat kimchang loh – ‘data deficient’ a dah a ni tih a sawi bawk.
Laitel chi thar hmuchhuaktu zingah MZU mithiamte an tel
