Thawhtan zing khan NBA play-off khelh chhunzawm a ni a, play-in atanga play-off khel phak ve hram Los Angeles Lakers chuan Western Conference-a pahnihna Memphis Grizzlies an hneh a, inlehthalna lian an thlentir. Thawhtan zinga inkhel dangah Milwaukee Bucks chu Miami Heat hneh lovin an tlawm ve bawk.
Direct-a play-off khel phak lo LA Lakers hi Griezzlies lakah an khel tha viau a, quarter hnihnaah an hnufual ve zeuh tih loh chu quarter dang pathumah chung-nung zawkah an tang vek. Grizzlies muala leng lut Lakers hi quarter khatnaah point ngain chungnung zawkah an tang nghal a. Quarter hnihnaah mualneitu an insiamtha a, point 11 zeta chungnungin an khingpui an lehthal a. Point 6-a hmahruai chungin chawlhlawk an hmang.
Chawlhlawk hnu lamah LA Lakers an khel tha chhunzawm a, an hawi kir tawh lo. Quarter thumnaah point 8 a an chungnung hnuin quarter hnuhnung berh point 10 zetin an sang fal leh a. Mualneitu Memphis Grizzlies lakah point 128-112 in hnehna lian an sualchhuak a. Series-ah 1-0 in hma an hruai zui ta a ni.
Griezzlies an hneh tum hian Lakers tan Rui Hachimura chuan point 29 a thawkchhuak a. Austin Reaves pawhin point 23 a thawkchhuak ve bawk.
Thawhtan zinga inkhel dangah Western Conference top seed Milwaukee Bucks chu Eastern Conference-a pariatna Miami Heat lakah point 130-117 in an tlawm. Heat an hneh loh tum hian Bucks player pawimawh Giannis Antetokounmpo chuan hliam vangin a khel tluan thei lo. Miami Heat in Bucks lakah hnehna pawimawh tak an chan tum hian Heat tan Jimmy Butler chuan point 35 a thawkchhuak a, a chetha hle.
Thawhtan zing vek khan LA Clippers chuan point 115-110 in Phoenix Suns an hneh a, Denver Nuggets in point 109-80 in Minnesota Timber-wolves an hneh ve bawk. Play-off hi tukin leh naktuk zingah khelh chhunzawm a ni ang.
Lakers in Griezzlies an lehthal
