Sialhawk khua in an lakhuihthei tharchhuah Guwahati lama hralhna tur an biakrem pui tawh chu tum khat chauh an kal hman tihin national highway kawng chhia avangin an rawn chhunzawm thei loa, MIFCO-in a leisak thung.
Mizorama lakhuihthei thar tam ber Sialhawka lakhuihthei chingtute chuan tunlai hian lakhuihthei an la seng mek a. An thar tantirh lamah Guwahati-a North East Aromatic & Herbs company hnenah a rah hring kg. khat Rs.10-in pek a ni. Vawikhat an rawn kal a, kawng chhiain a tihbuai tak avangin hralh chhunzawm theih a ni lo.
Lakhuihthei hralhnaah harsatna an tawh avangin Sialhawk Pineapple Growers Society chuan MIFCO chairman Lalthazuala Rawite hnenah Chhingchhipa MIFCO hmuna sawngbawl turin Sialhawk lakhuihthei leisak turin an ngen. MIFCO chairman hma laksakna azarah August 13 atang khan MIFCO-ah an chhunglut a, MIFCO-in lakhuihthei an leisak zawng zawng hi quintal 170 leh kg 88 a ni.
Lakhuihthei an hralhna man hi MIFCO hian a pe nghal a, Society hian a hmuna a va dah avangin Kg ah Rs.15 hisapin a laksak a ni.
Lakhuihthei hralhnaa an harsat zual chhunga MIFCO-in an laksak avangin MIFCO chairman Lalthazuala Rawite leh a thawhpuite chungah Society chuan lawmthu an sawi a ni.
Mizoramah Aizawl leh khawpui dangah Sialhawk lakhuihthei hi an hralh thin a. August 26 thleng khan quintal 7500 vel an hralh tawh.
Sialhawkah hian lakhuihthei chingtu chhungkaw 250 vel an awm a. Mizoram puma lakhuihthei thar chhuah atanga zaa 64 vel hi Sialhawk thar chhuah a ni.
Lakhuihtheiin kawng chhia tuar MIFCO-in sawngbawl turin lei
