Lal Nikuala lungphun leh
Chawngtlai khaw haw runpui
Chawngtlai lal, Nikuala lungphun leh Chawngtlai khawchhuak haw runpui chu Ningani khan hman a ni a. Tuichang bialtu MLA, deputy chief minister Tawnluia’n a hmanpui.
Lal Nikuala chu Mizo hnam thinlung pu mi leh hnam hmangaihtu dik tak a ni tih Tawnluia hian sawiin, “Sapho awpbehna kara Mizo ram leh hnam humhalh tura a beihna leh hnathawhte kha Mizo hnam chanchinah hriatreng a ni dawn,” a ti. Lal Nikuala lunghahna Alipore Jail chu a hoa tlawh a duh thu sawiin, Chawngtlai khaw mite chu lal Nikuala hnungzuia Mizo hnam hmangaihna thinlung pu turin a sawm.
Chawngtlai Welfare Committee (CWC) leh Mizo Historical Village Society (MHVS) lehkhabu buatsaih ‘Lal ropui Nikuala leh Chawngtlai Khua’ chu deputy chief minister hian a tlangzar nghal a. Lal Nikuala lungphun hawn, Chawngtlai khawchhuak haw runpui leh lehkhabu pahnih – PiPu Chhuahtlang hawn puala souvenir ‘Chawngtlai Par’ leh ‘Lal ropui Nikuala leh Chawngtlai khua’ buatsaih a ni chu lawmawm a tih thu sawiin, nakin zelah pawh lehkhabu rotling, Mizo hnam chanchin chhuilet theihna tur an ni tih a sawi.
Chawngtlai khua hi 2014 February 21 khan ‘Mizo Historical Village’ ah puan a ni a. Khaw malkhaia Mizo pi leh pute sulhnu awm tamna ber nia ngaih a ni. Tun tuma hawn tak lal Nikuala lungphun hi feet 28 a sang, kil thum neia siam a ni a; kilthumahte hian lal Nikuala chanchin, thulakna rintlak tak tak atanga lakkhawmte dah a ni.
Lal Nikuala lungphun hi 2015 June 18 khan Assembly speaker Lalrinliana Sailo, khatih laia Tuichang bialtu MLA chuan a lungphum phumin a hmunhma laihzawl hna thawh tan a ni a. Tuna bialtu, deputy CM, Assembly speaker Pu Lalrinliana Sailo, Art & Culture Department, MHVS, CWC leh mi inphalte hnen atanga sum hmuh hmangin siam zawh a ni.
Lal Nikuala lungphun leh Chawngtlai khaw haw runpui
![](https://theaizawlpost.org/wp-content/uploads/tap_logo-min-large.jpg)