Mizoram-in chief minister a neih ve nual tawhah Pu Lalduhoma aia corrupt an awm lo tih Congress hruaitu Zodintluanga chuan a sawi.
Zirtawpnia Congress Bhavan-a inkhawmah MPCC adviser Zodintluanga chuan, chief minister-in an sawrkar hma khan portfolio a nei ve dawn lo tih sawi mah se, a CM hnu in portfolio tha tha a chang leh si tih a sawi.
“CM kan lo nei ve nual tawh a, Pu Lalduhoma aia corrupt hi an awm lo. CM atana swearing in a neih hma hauhin a inhmun a lai nghal a, lian takin a sa mek. Kan CM pakhat khan nui hluah hluah chungin dawt a sawi thin a, tunah CM awihawm taka dawtsawi thiam kan nei mek,” a ti.
Sawrkar kalta in engmah an ti lo tih an sawi thin laiin, khaw hrang hrangah mipui mamawh sawrkarin a lo din tawh hle a, chu chu ZPM awm hmaa siam vek an ni tih a sawi bawk.
MPCC president Lal Thanzara pawhin IAF hnenah MNF sawkarin ram hralh an tum a, ZPM sawrkarin man man taka a hralh chhan chu sawi vak ngaiin a hre lo tih a sawi. Party pathumin inlungrual takin CBI chhui tir turin an ngen tih sawiin, “Heti khawpa party pathum kan inlungrual avang hian mantang eitute chu an man chhuah thuai a rinawm,” a ti.
ZPM sawrkar hruaituten Lengpui bul ram hralh thuah CBI hnenah general consent an pek loh chuan mantang eitute manchhuah chu thil harsa tak a ni dawn a, chuvangin general consent pe turin an ngen a. An pe lo a nih chuan Delhi lama AICC hotute rawn chungin Supreme Court thlengin a tul angin hma an la dawn tih a sawi a ni.
Hun kaltaah khan an party sawrkarin kohhran pawi an lo sawi palh a nih chuan ngaihdam a dil a, an sawrkar leh a nih chuan kohhran rilrem loh zawng an ti ngai tawh dawn lo tih a sawi.
Lalduhoma aia corrupt an awm lo – Zodintluanga
