Lallianmawia Pachuau chanchin
sawiin international seminar nei
Zai thiam leh hlaphuah thiama lar Lallianmawia Pachuau chanchina sawiho tur hrang hrang sawihoin Ningani khan Aizawlah international seminar neih a ni
Seminar hmanpuitu minister K Sapdanga chuan, Lallianmawia Pachuau chu a hla phuah hun laia a kum leh a hla thu ngaihtuahin, mi ropui leh danglam bik a nih zia a langchiang tih a sawi a. A hun laia hla lo piang kha ennawn lehin a hlate kha a danglam bik em em a, a hla thute a thuk bikin a ril em em vek tih a sawi
“Love song a siam a, gospel hla a siam a, lar tak vek an ni. Amah kha zai a thiam lehzel a, talent a nei tha em em a ni,” a ti a. An hun hman chuan zirlaite tan hlawkna a chhawp chhuah ngei a beisei tih a sawi a ni.
Govt. Hrangbana College assistant professor Rohmingthanga Ralte chuan, “Lallianmawia Pachuau: A tan hmangaihna” tih paper a buatsaih a sawizau a. Mizoram University guest lecturer Lalnunzama Khiangte buatsaih “Lallianmawia Pachuau hlaa Intukna (Satire)” tih pawh amah hian sawizauin, ICFAI University assistant professor VL Muanpuia’n “Lallianmawia Pachuau hlaa Poetic Technique” tih paper a buatsaih sawiin, Govt. Kolasib College assistant professor G Lalnuntluanga’n “Lallianmawia Pachuau leh Zai” tih a paper buatsaih a sawizau bawk.
“Hun leh Chatuan: Lallianmawia Pachuau hla atanga thlirna (Time and Eternity: Human Finitude and Divine Omniscience)” tih Mizoram Christian College assistant professor Lalremruati Ngente; Govt. Khawzawl College assistant professor Dr F Lalzuithanga’n “Lallianmawia Pachuau Pathian hlate thlirna” tih; “Lallianmawia Pachuau in hringnun a thlir dan” tih Govt Kolasib College assistant professor H Lalawmpuia; “Lallianmawia Pachuau hlate leh tisa inthlakhlelhna: A hla thu a sex hnuhma zirchianna” tih Govt. Kamalanagar College assistant professor Laltlanmawia Vuite tih pawh ngaihthlaka sawiho a ni bawk.
Lallianmawia Pachuau chanchin sawiin international seminar nei
