Lalpa Chhiahhlawh symbol ‘zungbun’

MLA inthlanpuiah Lalpa Chhiahhlawh Intelkhawm chuan an symbol atan ‘zungbun’ an hmang dawn.
Inrinnia Kolasib-a thuthar thehdarhtute hmaah Lalpa Chhiahhlawh Intelkhawm chuan kumin inthlanpuiah Pathian lalram sawrkar an din tur thu sawiin, chu Pathian lalram sawrkar rorelna hmathlir chu an sawifiah. An hruaitu RevDr Zaichhawna Hlawndo chuan Pathian lalram sawrkar hmathlir hi party manifesto ang a ni loa, khawvel rama la ding ngai lo, democracy rama la piang ngai lo ram leh hnam din chhuahna tur leh Zofate mahnia ro inrel, independent nation kalkawng tur a ni tih a sawi.
“Zofa hnamdangte awpbehna hnuai ata chhuah zalena kan awmna tur rorelna a ni dawn a. Pathian lalram sawrkar lo ding chuan hnam nihna puan (identity referendum) leh Zofate ramri chinfela kan nihna ang taka kan dinchhuahna tur a ngaipawimawh ber dawn. Kan ram, kan hnam hruaitu tura mihring thlan lalna ni tawh loin, Pathian lalram sawrkar a nih tawh dawn avangin, party manifesto, mihring duhdana ram hruaina a ni tawh loang,” a ti.
Serlui biala Lalpa Chhiahhlawh ding tur Vanlalnghaka, Saipum a nih tur thu an puang a. Lalpa Chhiahhlawh Intelkhawm hi bial leh constituency tina ding tura an inbuatsaih mek thu leh independent-a ding tur zawng zawng chuan thuthlung khat, symbol pakhat ‘zungbun’ an hmang dawn tih an sawi a ni.
Mihring thlan lal tum tawh loa, Lal Isua lalna tur chauh buaipuia Lalpa Chhiahhlawhte tan Pathian lalram sawrkar a din theihnan, zungbun-ah vote thlak vek turin mipui an ngen tih a sawi.