Lalpa hnenah Joseph Zaihmingthanga a awm ta
‘Nitin Lalpa i hnena awm ka duh’ tih hla a sa thin a, tunah chuan nitin Lalpa hnenah a awm tawh ang! Mizo rimawi khawvela hriathlawh ber te zinga mi Joseph Zaihmingthanga chu May ni 7, chawhnu dar 1:20 khan lungphu chawlin a thi a, vawiin chhun dar 12-ah Ramhlun Indoor Stadium-ah vui a ni ang. Zaia hian a fate pahnih a kalsan a ni.
Joseph Zaihming-thanga hi a taksa hriselna lamah insawisel neuh neuhna nei ve deuh reng a ni a, mahse, tunlai chu amah rau rauah pawh a that lai niin a thian hnaite chuan an sawi. Zaia hi May ni 7 hian Sunday School pawh a inkhawm a, inkhawm banah an khawmchhak pa, Sangluaia nen haw dunin, Sangluaia chuan, “Inkhawm bang kan haw, step-a ka kal laiin ka darah min rawn kuah a, ‘A lum bawka mut a chhuak duh hle mai,’ a rawn ti nghe nghe a ni,” a ti.
Zaia hi a pindanah amahin a tawngtai a, a tawngtai lai hian an nula chuan thawm ri deuh rup a hria a, thil thlauh ri emaw a ti a, a hnu deuha a va en chuan Zaia chu a khum bul chhuatah nikhaw hre loin a lo let reng a, thenawm hnai inpunkhawmin a mar (pulse) an en chuan, a marphu an hmu zo tawh lo. Chutah hmanhmawh takin LRM Hospital panpui nghal a ni a, LRM Hospital an thlenpui hian chawhnu dar 1:20 chiah a nih thu damdawi in kalpuitu pakhat chuan a sawi a, damdawi inah hian an lo bawihsawm nghal a, mahse, doctor-te chuan damdawi in thlen hian a thi fel tawh niin an sawi a, damdawi in thlenpui hun hi a thih hunah an puang ta a ni.
Mak ang reng takin Zaia hian hmanni lawka an kawmnaah, “ Love song kan sa a kan han lar hluai atanga a kum thumnaah ka piangthar a, chuan, ka pianthar atanga a kum thumnaah impumpekna ka hmelhriat tan a, inpumpekna ka hmelhriat atanga a kum thumnaah thu ka sawi tan a, thu ka sawi tan atanga a kum thumnaah chuan Revival-ah ka lut a, Synod Revival-ah term thum ka awm chiah a, ka thlawn leh. Ka thlawn leh atang khan kumin hi a kum thumna a ni leh chiah tawh a, eng emawni thil lian tham tak chu a lo thleng ang,” tiin a lo sawi zauh a ni.
Zaia hi Mizo mipa zaithiam zinga hriat hlawh ber pawl a ni a, 2001 vel atangin rimawi khawvelin a hmelhriat tan a, ‘Tah Chuan a Leng” tih hla a rawn lar pui a, reilote chhungin Zoram dung leh vang bakah ram pawn thlengin hriat a hlawh nghal a ni. Vanlalsailova lar vanglai taka rawn lar chhuak thei a, Robert Lalduhzuala te nen an lar vanglai takin Super Trio an din a, Mizo rimawi khawvelah na na na chuan anni aia an vanglaia boruak nei lian zawk an awm chuang lo.
Chumi hnuah thlarau lamah piantharna neiin, Pathian fakna hla an sa ta vek a, rawngbawlna lamah pawh Zoram deng chhuak khawpa hriathlawh an ni zui ta vek tawh a ni.
Tunah hian Super Trio hian project an nei leh mek a, kuminn October ni 15 hi Super Trio din champha vawi 20-na tur a ni a, hemi pual hian project neiin, tunlai hian inbuatsaihna an kalpui tan mek bawk a ni.
Lalpa hnenah Joseph Zaihmingthanga a awm ta
![](https://theaizawlpost.org/wp-content/uploads/2023/05/joseph.jpg)