Lammual Expo-ah ILP neilo 30 chuang man
Food safety leh taxation ah dan bawhchhia
Aizawl Lammual-a ‘expo’ neihah hnamdang sumdawng rawn lut zingah inner line permit nei lo leh nung tawh lo keng mi 36 man chhuah an ni a. An thil siamtute zingah food safety & standards lama an license thi tawh an awm bakah Taxation department-in sumdawngte chunga dan a phut ang zawm a ni lo bawk tih hriat a ni.
Mizoram Merchant Association (MIMA) leh Mizo Zirlai Pawl (MZP) leh tangdun chuan expo neih hma hian an lo thlirlawk tawh a. An chhuizui zelnaah dan bawchhiatna a awm ngei nia hria in October 10 khan expo neihna hmunah hian kalchilhin, hnamdang (Vai) he hmuna sumdawng zingah ILP nei lo leh an permit thi tawh, a then phei chu October 3-a thi tawhte hi an manchhuak a ni.
Ei leh in siam zingah Food Safety & Standards Authority of India-in hetiang siam phalna a pek, license tawh, February 2021 daiha thi tawh, Assam sawrkar atanga hetiang license nei pawh manchhuah an ni a. State Taxation department-in hetiang buatsaihtute tana tih tur dan a zawm pawh a hun chhung bituka tih hlawhtlin loh a awm tih an finfiah bawk.
Heng dan an bawhchhiat hi dan vekin a sawi dan chuan jail tan theihna leh sumfai thahnem tak chawi theihna a ni hlawm tih sawi a ni a. MIMA hruaitu hian ILP chungchangah Home minister an biakpawh thu leh, eitur siamtute license thih chungchangah Food & Drugs Administration lam an hrilhhriat thu te an sawi a. Home minister hian ILP nei lo ho hi rel hmanga thawn haw an ni dawn tih a lo hrilh bakah enzui zel an tum tih a lo hrilh a. FDA pawh hian vawiin – Thawhtanni lam hian an bawhzui tur thu an hrilh tih an sawi a ni.
‘He Expo-a hnamdang rawn sumdawng zingah mi 20 chuang mi pakhatin a sponsor thei leh a sponsor-tu Zorun Events neitu Laldingngheti Pautu, Lunglei-in a sponsor ho ngaihtuah zui miah loa, sumdawnna a kalpui hi hriatthiam har kan ti a. Hetiang thil hi kan ramah a thlen nawn tawh lohna turin a ranglama chhuichiang tur leh, Inner line Regulation dan bawhpelha mi pakhatin heti zat hnamdang a sponsor chungchangah hian action la turin thuneitute kan phut a ni,’ MZP leh MIMA hruaitute chuan an ti.
The Mizoram Gazette Notification Guidelines for the Enforcement of the Inner line Regulation-in Mizoram-ah ILP hi mi pakhatin 10 aia tam a sponsor theih loh thu a inziak tih an sawi. Chutiang a nih laia mi 20 chuang mi pakhatin a sponsor leh thei si chu ILP kalpui dan mumal loh vang leh thuneitute inthlahdah vang a ni, tiin, ILP pekchhuah kawngah pawh fimkhur lehzual turin thuneitute an ngen nghal bawk.
Lammual Expo-ah ILP neilo 30 chuang man Food safety leh taxation ah dan bawhchhia
