Kum upat tawh ang aia lan naupan theih i chak em? Chutiang ni thei tur chuan ei leh in a pawimawh hle. Tun tumah hian Times of India health section-in lan naupan theih nana chaw tha ni a an sawi te kan rawn tarlang e.
A pawimawh hmasa ber chu kan nitin ei leh inah protein a pawimawh. Protein kan hmuh theihna chaw tha te chu arsa, artui, lui lam sa te niin, peanut butter, bawnghnute, yoghurt leh low fat cheese te a tha hle.
I ei tur rawng pawh a pawimawh. Thlai leh thei rawng purple lam ei tam ang che, thei-ah chuan plum leh berries te a tha hle a, zikhlum purple te pawh a tha a, kidney beans pawh a tha hle. Heng thei leh thlai hi mi tilang naupang thei chaw tha tak an ni.
Thlai ei tam a tha tih chu kan hre vek a, mahse, kan thlai ei chu ang atana tha nge tih erawh kan hre vak lo. Thlai hnah hring tak/duk deuh hi ruh tan a that bakah mit tan a tha a, carrot leh tomato te hian anti-oxidant an pai hnem a, lan naupan nan a tha bawk. Broccoli hian lung natna chi hrang hrang a veng thei a, Vitamin C a pai hnem a, lan naupan theihna chaw tha tak a ni bawk.
Nuts lam chi pawh ei tam a pawimawh, almond leh khawkherh hian chakna min pe a, thluak tana chaw tha an ni bawk. Dark chocolate pawh tam lutuk lo a ei zeuh zeuh a tha hle.
Lan naupan theih nana chaw tha
