MUHCS kalpuina atana Mizoram State Health Care Society (MSHCS) leh Synod Hospital Durtlang ten inenkawlna senso chungchanga inremna, Memarandum of Agreement (MoA) an siam dan copy leh rate kimchang pe chhuak tura advocate pakhatin RTI hmanga a dil chu, confidentiality clause tlawhchhanin information pek chhuah a ni lova. Information diltu hi Mizoram Information Commission (MIC) ah a zualko a. MIC hian RTI dan tlawhchhan neiin, information diltu hnenah hian a duh ang pechhuak turin MSHCS hi a hriattir a, mahse MSHCS lam hi High Court-ah an zualko ve thung a. High Court-in a ngaihtuah hnuah, MUHCS chu mipui tana duan leh mipui sum hmanna a nih avangin ‘public interest’ a ni a, langtlang taka kalpui tur a ni, tih leh, RTI Act 2005-in puanzar loh tur chi thil thenkhat a tarlan chuan Health Care Society leh Synod Hospital inremna hi a huam lo a, MoA hi puanzar theih chi a ni, a ti a. A tawi zawngin, RTI diltu zawhna hi a thlawnin 2026 September 23 ral hmaa pe chhuak turin MIC chuan SPIO a hrilh ta a ni.
MSHCS lamin RTI dan an tlawhchhan hi, Section 8-in puanzar loh tur (Exemption from disclosure of Information) a tarlan zinga commercial kaihhnawih awm chhun Section 8(d) hi a nih hmel a; a bak chu ram venhimna chungchang te, court thubuai, legislature kaihhnawih, etc. a ni hlawm.
RTI Dan Section 8(d) chu hei hi a ni: Information including commercial confidence, trade secrets or intellectual property, the disclosure of which would harm the competitive position of a third party, unless the competent authority is satisfied that larger public interest warrants the diclosure of such information” (Sumdawnna lam hawi thuruk leh sumdawnna kalpui dan thurukte, mimal thil thiam leh themthiamna thurukte chu a neituten sumdawnna kawnga an chhiat phah theihna tur chi a nihin. Amaherawhchu, thuneituin chutiang information puanzar chu vantlang hamthatna tur nia a hriat chuan puanzar theih a ni)
MSHCS hian inenkawlna senso chungchangah a thawhpui empanelled hospital-te hi rate angkhat vekin agreement a neihpui lo tih chu Synod Hospital Durtlang te, phai lam hospital leh Mizoram chhunga empanelled hospital dangte-ah hian a hriat a. Healthcare system a lo pian chhan hi chu mipui a ni a, sumdawnna thil a ni lo. Mipui mamawhna phuhrukna tur a ni a, mipuiin Mizoram chhunga hospital hrang hrangte an chhawr tangkai theihna tura ruahmanna siam kha MUHCS-in a tum ber tur chu ni mai awm tak a ni a. Tuna hetia Court thurem ngaia kan awm ta hi a zia lo hle a ni.
Eng vangin nge langtlang taka thil kalpui theih a nih tak loh? Tuna private hospital thenkhat MUHCS la rawn zawm lote pawh hi, engtikah emaw chuan agreement neihpui theih an la ni maithei; chung hunah te pawh chuan, mipui tana party pahnih inremna a ni a, han thup tehchiam tur a awm hran lo a ni. Kan target ber chu mipui a ni tihah hian chiang tlang ila, langtlang tak zelin maw le…!
Langtlang tak zelin aw…
