Lapaw chini hralh khap pung zel

Cotton candy (lapaw chini) in cancer a thlen thei em? Indian state thenkhatah chuan cancer thlen thei tiin lapaw chini hralh an khap tawh.
Kar kalta khan Tamil Nadu sorkar chuan lab test neihnaah lapaw chini-ah chuan cancer siam thei Rhodamine-B hmuh a ni tiin an state a hralh a khap nghal bawk.
Tun thla tir lam khan Puducherry chuan an state-a hralh a khap hnuah state dang dang pawhin sample test an nei zui ta zel a ni.
Lapaw chini hian India ram mai ni lo khawvel pumah naupang tena an ngainat em vanga lar a ni a. amusement park, fairs leh entertainment hmun naupangte tlawh zinah chuan a awm zel anga ngaih a ni a, a ban chat bawk a, kaah tuiralin naupang ten an ngaina a ni.
Mahse hlauhawm rukna a nei tlat a. P Satheesh Kumar, Chennai a food safety officer chuan Indian Express hnenah lapaw chini chuan cancer thlen theiin taksaa organ tin te a khawoh thei tlat a ti.
Sorkarin test a neihah chemical compound Rhodamnine-B hmuhchhuah a ni a, he chemical hi textiles dye nan te, cosmetics leh inks siam nan te a hman thin a ni.
Zirchiannaah chuan he chemical hian cancer a thlen thei tiin Europe leh California-ah chuan eitur rawng thlak danglam chu dan kalh a ni tawh bawk.
Tamil Nadu a cotton candy khap a nih hnuah Health Minister Ma Subramanian chuan thuchhuah a siamah Rhodamine-B telna inneihna emaw public event ah packaging, chawkluh leh eitur siamah a tel chuan Food Safety and Standards Act, 2006 hmangin hrem theih a ni a ti a.
Tamil Nadu tihdan zuiin Andra Pradesh pawhin candy sample test a nei mek bawk a, Delhi pawhin a khap dawn nia sawi a ni bawk.