Larsap-in a hna chhunzawm
MLA leh BRO hotu a kawm
Hriselna that loh avanga chawlh la Mizoram larsap Dr Hari Babu Kambhampati chuan a hna a chhunzawm thei tawh a; Ningani khan Aizawl Football Club president Robert Romawia Royte, MLA leh Project Pushpak chief engineer Girish Prasad Singh ten an hmu.
Aizawl FC aiawhte hian N. Lunglenga AFC football field-a phullem phahna atana Power Finance Corporation (PFC) corporate social responsibility fund cheng nuai 546.90 atanga an dilchhuah thu leh Mizoram State Sports Council chu implementing agency-a ruat a ni tih a sawi. 2023 October 11-ah agreement ziahfel tawh niin, MLA inthlanpui model code of conduct avanga sawrkar hmasa hunlaia thawh hman a nih loh thu leh tun thlenga hmalakna a awm loh avanga sum sanction cancel an hlauh thu larsap hi an hrilh. He sum hi Aizawl FC project atana sanction a nih anga a hna thawk tur pawha midang ruat loa, an mawhphurhnaa dah an beisei tih pawh an hrilh.
Aizawl FC aiawhte hian he sum, nuai 546.90 bakah hian Rajya Sabha MP Fund leh North East Consultancy Service sum thawh ve tur nen tanghoin, field gallery pawh siam tel an tum avangin midang thawh chi niloa an hriat thu larsap hi an hrilh. PFC hian MSSC-in hma a lak loh avangin lehkha an rawn thawn a, hma lak loh chhan an zawtfiah mek a, project hnuhdawh an hlauh thu an sawi bawk.
Larsap hian Aizawl FC leh Mizoram thalai tana tangkai tur rothil a nih avangin lo puih ngei a tum thu a lo hrilh a ni.
Larsap-in a hna chhunzawm MLA leh BRO hotu a kawm
