Larsap-in NCC cadet-te lawmpui
Republic Day Camp 2025-a tel Mizo NCC cadet 58 chu larsap Gen Vijay Kumar Singh (Retd) chuan Zirtawpni khan Raj Bhavan-ah lawmpuina a buatsaih a. Chief minister Lalduhoma leh Youth Services minister Lalnghinglova Hmar ten an telpui bawk.
Larsap chuan India ram pum huap leh ngaihhlut hlawh Republic Day Camp-a Mizoram NCC cadet an tel thei chu ropui a tih thu leh, hemi tura Mizorama NCC unit hrang hrang thawhrimna, inpekna leh rawngbawlna chhuanawm a tih thu a sawi. NCC chuan thalaite nunah inthununna, hruaitu zia leh ram hmangaihna a tuh a ni, a ti. NCC chu ram hruaitu chherchhuaktu pawimawh tak a lo nih tawh thin thu leh NCC ah chuan taksa leh sipai lam kaihhnawih intuaihriamna mai bakah kawng engkima hmasawnna ngaihpawimawh a ni a, training tha tak tak an neih thin avangin armed force-ahte pawh an tlin phah thin a ni, a ti bawk.
NCC NE Region addl. director general Maj Gen Gagan Deep chuan report pein lawmthu a sawi a. Larsap leh chief minister-te hian Republic Day Camp-a tel NCC cadet-te hnenah chawimawina an hlan bakah an tawnhriat zawtin an kawm a ni.
Kumin Republic Day Camp-ah hian Mizoram atangin NCC cadet 58; 20 Mizo Bn. NCC Pipe Band cadet 45, 1 Mizo Bn. NCC cadet 2, 2 Mizo Bn. NCC cadet 1, 1 Mizo Air (Flying) Squadron NCC cadet 3, Thal Sainik Camp-a tel 20 Mizo Bn. NCC cadet 1 leh All India Vayu Sainik Camp-a tel 1 Mizo Air (Flying) Squadron NCC cadet 6 an tel a ni.
Larsap-in NCC cadet-te lawmpui
