Larsap-in NCC Group Hq hawng
Mizoram puala din National Cadet Corps Group Headquarters Aizawl chu Zirtawpni khan larsap Gen. Vijay Kumar Singh (Retd) chuan Group commander Brig Gunjit Singh Arora kutah NCC Group HQ Aizawl puanzar hlanin a hawng a, Group HQ NCC Aizawl puala siam ‘My Stamp’ a tlangzarh bawk.
Larsap chuan kum 1964 atangin NCC-in Mizoramah hmalakna leh hlawhtlinna chhuanawm tak tak a nei tih sawiin, thalaite tan inthununna leh hun remchang siamsak kawngah NCC aia thawh hlawk pawl dang a awm bik lo tih a sawi. Sipaia luh tum tan phei chuan NCC-a tel tluka tha a awm lo tih a sawi a ni.
NCC cadet-te chu an thupui ‘Inpumkhatna leh Inthununna’ tih tha taka zawm tlat tura fuihin, NCC hnuaia hmalakna – vantlang rawngbawlna, chhiatrupna thlen thulha chet lak, thisen pek, leilung leh a chhunga cheng venhim hna leh mipui zirtirna lam hawi an kalpui thin chuan thalaite khua leh tui tha ni turin a chher thin tih a sawi bawk.
Mizorama NCC batallion hi Silchar Headquarters hnuaiah a awm thin a. Tunah chuan brigadier thutchilhin Aizawlah Group Headquarters a nei tawh dawn a ni. NCC hi Mizoramah kum 1964 khan din niin, tunah hian batallion pali a awm a, Aizawlah battalion thum (20 Mizoram Bn NCC, 1 Mizoram Bn NCC leh 1 Mizoram Air Sqn NCC), Lungleiah battalion khat (2 Mizoram Bn NCC) a awm.
Mizoram sawrkar chuan 2024 June 18 khan NCC Group HQ Aizawl din turin sanction letter a tichhuak a. Hma lak chhoh nghal niin, 2025 July- October chhung khan Aizawlah group commander, deputy group commander leh training officer dah an ni. NCC Group HQ Aizawl hawn tur khuhhawnna atan Ningani khan chief minister-in NCC Group HQ Aizawl puanzar a lo tlangzarh tawh bawk.
Larsap-in NCC Group Hq hawng
