Larsap-in SIC thar tur a lalut
Mizoram State Information Commission (MSIC) hnuaia state information commissioner atan Dr Lalzirmawia Chhangte, IAS (Rtd) chu Thawhlehni khan larsap Gen. Vijay Kumar Singh (Retd) chuan Durbar Hall Lok Bhavan-ah rinawmna thu tiamtirin a lalut.
Lakluh inkhawmah chief secretary Khilli Ram Meena chuan larsap-in state information commissioner atana Dr Lalzirmawia Chhangte a ruatna notification a chhiar hmasa a. Hemi hnu hian larsap chuan rinawmna thutiam chham tirin a lalut a ni.
Chief minister Lalduhoma, Assembly speaker Lalbiakzama, minister pathum – Lalthansanga, PC Vanlalruata leh B Lalchhanzova bakah official dang leh sawmbikte an tel a ni.
Mizoram state information commissioner atana lakluh Dr Lalzirmawia Chhangte, IAS (Rtd.) hi Tarpho, Hnathial district khaw chhuak niin, thiamna lamah BA (Hons. in Education) (NEHU 1986), LL.B (NEHU 1993), MA (Public Administration) (HPU Shimla 2001), BCS (Serampore College 2007), D.Min (Serampore College 2018) leh Ph.D (Public Administration) (MZU 2023) degree nei a ni.
1991 May 30 khan Mizoram Civil Service zawmin, 2019 December 3 khan Indian Administrative Service (IAS) a hlankai a ni a, AGMUT Cadre 2009 allot a ni. Serchhip district bawrhsap a nih hnuah Mizoram sawrkar hnuaia department hrang hrangah secretary a ni a. Commissioner-a a kaisan hnuah Excise & Narcotics Department-ah a awm a, Commerce & Industries commissioner a nih laiin 2025 August 31 khan superannuation pension-in a chhuak a ni.
Larsap-in SIC thar tur a lalut
