Larsap-in State Day chibai buk
Mizoram State Day pualin larsap Gen Vijay Kumar Singh (Retd) chuan thuchah siamin mipui hnenah lawmpuina chibai a buk a. Mizoram leh India chak leh hlawhtling zawk siam tura intiam thar turin mipui a sawm.
1987 February 20-a India ram state 23-na ni tura hlankai Mizoram chu tan he ni hi hmasawnna, remna leh hlawhtlinna tura bultanna thar duhawm tak a ni tih a sawi a. Tawrchhelna, inpumkhatna leh Mizo mipui beiseina a taka chantir leh nemnghehna a ni, tiin, inbiakna leh mipui thlan rorelna kaltlanga hnehna lantir a ni a, hei vang hian Mizoram Peace Accord chu 1986 June 30-ah India sawrkar leh Mizo National Front-in ziakin, hei hi India ram chanchina inremna hlawhtling bera ni hiala ngaih a ni tih a sawi.
State-a hlankai a nih hnuah Mizoramin zirna, hriselna, hmasawnna ruhrel siam leh nitin khawsak kawngah hmasawnna chhinchhiah tlak tak tak a nei tih larsap hian a sawi a. Mizo hnam ziarang hausa tak, nunphung nghet tha tak bakah lungrual leh inpawh tlang taka khawsak hona chuan ram pum a fan hneh hle tih a sawi bawk.
He hunah hian sawrkar laipui program, India ram state leh union territory hrang hranga chengte inkara inhriatthiam tawnna leh inpumkhatna tizual deuh deuh tura hmalakna, ‘Ek Bharat Shreshtha Bharat’ chungchang sawilan a duh tih a sawi a. Hei hian hnam hrang hrang inkarah inunauna leh inpumkhatna siam a, India khua leh tui kan nihna tih fiah zual a tum tih a sawi.
“Ek Bharat Shreshtha Bharat thil tum hrerengin, midangte hnam ziarang leh nunphung inngaihvena inzirtawn turin ka sawm che u a. Mahni hnam ziarang leh nunphung hloh then chuang loin hnam inpumkhatna a kalpui theih a ni,” larsap hian a ti.
“He ni chhinchhiah tlak takah hian Mizoram leh India ram chak leh hlawhtling zawk siam turin intiam thar theuh ila, ram leh hnam rohlu vawnghim a, chhuan lo la awm turte hmakhua ngai chungin lungrual takin hmasawnna hna thawk tlang ang u,” a ti bawk.
India rama cheng hrang hrangte hnam ziarang leh nunphung zaha vawnghimtu mai bakah India ram chu kum 2047-ah ram changkang leh intodelh ‘Vikshit Bharat’ ni tura hmalakna kawngah theihtawp chhuah theuh turin mitin a sawm tih a sawi a ni.
Larsap-in State Day chibai buk
