Association of Surgeons of Mizoram (ASM) chuan Ningani khan Aizawlah annual conference an hmang a. Larsap Dr Hari Babu Kambhampati chuan a hmanpui.
Damlo zai ngai zaitu bik doctor (surgeon) te thawhrimna leh an thil tawn atangin damlote enkawlna tha zawk thiamna thar tam tak a lo chhuak tawh tih larsap hian a sawi a. Damlo enkawlna leh natna zirchian kawngah surgeon-ten an thawhhlawk hle tih a sawi.
Surgeon-te hna chu hna pawimawh tak, mipuiin kan mamawh a nih rualin, hna khirh leh fimkhur ngai tak a ni, tiin, “Tih fuh loh palh chang a thleng ve thin a. Hengah hian surgeon-ten mipui dem in hlawhin in hnathawh that a hliah khuh thei thin. Theihtawp chhuaha in finna leh thiamnate damlo enkawl damna atana hmangtu hi mipuiin kan zahthiam a, in rawngbawlna hi kan hlut thiam a ngai,” a ti.
Doctor-te pawh sawiselna a awm pawhin zam mai loa, tihdam rawngbawlna thawktu, hna zahawm bik thawktu an nih angin tha takin an hna uluk lehzuala an thawh a ngai tih Dr Hari Babu Kambhampati hian a sawi a. Zoram hmun chengker leh kilkhawra tihdam rawngbawl hna thawktute chuan mipui lam atanga thlawpna leh an hnathawh hlutsak an phu tih a sawi a ni.
Nikuma ZMC surgeon-te hlawhtlinna sawiin, “Dr John Lalliandinga kaihhruai medical team-in Zoram Medical College-a conjoined twins hlawhtling taka an zai kha thil ropui tak a ni a. ASM chhungkua ka lawmpuiin, ka chhuang a ni,” a ti.
National Health Mission hnuaia sawrkar laipuiin kan hrisel zawkna leh hma kan sawnna tura hma a lakna tihhlawhtlin kawngah doctor-te inpekna leh thawhrimna chu thil pawimawh ber zing ami a ni, tiin, doctor-te chu tan la sauh sauh turin a fuih.
Conference-ah hian Dr R Tlangkunga Oration segment-ah Dr Om Tantia chuan “Minimal Access Surgery: Lessons learnt in a journey of 3 decades” tih thupui hmangin zirtirna a pe a ni.
Larsap-in surgeon-te fuih
