Mara Autonomous District Council sawrkar thar chuan larsap kaltlanga state sawrkar atanga order kal thin chu an pawm ve dawn lo tih chief executive member M Laikaw chuan a sawi.
Thawhtannia Siaha-a thuthar thehdarhtute a kawmnaah MADC CEM chuan, an term chhungin thuneihna lian zawk bawhzui a ni dawn a, an autonomy humhalh turin hma an la zel dawn tih sawiin, “Larsap paltlang loa state sawrkar atanga order MADC tana lo chhuak thin hi kan pawm ve dawn lo,” a ti.
MADC atanga thlatin hlawha pekchhuah cheng nuai 1500 chuang chu MADC huamchhunga cheng mipuiin Rs.3000 chuang theuhin an chang thei a, chuti chunga sum vang em em leh an rethei si chu, an loan puk dan thlengin her danglam an tum a, VC-te inrelbawl dan thlenga enpui an tum tih a sawi.
MADC sawrkar policy lianber chu ‘New Maraland’ din a ni tih M Laikaw hian a sawi a. Good governance siamin, corruption tihbo a ni anga, tul loa sum tam tak hmanralna chi chu tihbo a ni dawn, tiin, “Expenditure control-in motor hire leh POL ah pawh khuahkhirh vek tum a ni. State pawna khuallian kal pawh khap a ni. Department mamawh leitu tur Purchase Board din a ni anga, hemi kaltlang chauh hian office mamawh lei a ni tawh ang,” a ti.
Non tribal trading chungchang chu an enzui dawn a, khauh taka kalpui tum a ni tih MADC sawrkar hotu hian a sawi. Identity base-a rorelna nei an nih avangin Art & Culture an ngaipawimawh dawn a, customary law chu gazetted tura thawn a ni tawh a, Board of Literature pawh ngaihpawimawh a ni dawn tiin, file pawh LDC to HA thleng chu Mara tawnga kaltir tan a ni tawh tih a sawi a ni.
MADC sawrkar inthlak chungchangah BJP leh MNF thawhhona tur chu chunglama sawifel vek niin, chief minister meuhin lo kalpui zel rawh u, a tih bawhzuia minister Dr K Beichhua hoa hmalakna chu, MNF chhungkua legislature-ah inhmuhthiam lohna an neih tak avangin minister thlengin ban a ni ta tih M Laikaw hian a sawi bawk.