Fifa Club World Cup 2025 khelh chhunzawm zel a ni a, German champion Bayern Munich chu last 16 lut hmasa ber an ni. Zirtawp zanah Bayern Munich in hnehna an chan laiin English club lian Chelsea chu Flamengo hneh lovin an tlawm ve thung.
Group C-a inkhelah zirtawp zan khan Bayern Munich in Argentina club lian Boca Junior an hmachhawn. An khelh hmasak berah hnehna chang tawh Bayern Munich hian Boca Junior lakah 2-1 a hnehna changin point thum an hmuh belh a, khelh hmabak khelh khat la nei chungin last 16 an lut chiang nghal.
German champion Bayern hian Boca Junior lakah bul an tan tha viau a, inkhel tan atanga minute 18-na lekah Harry Kane chuan hmahruaina goal a thun nghal. Hma takah goal an thun vangin an phur a, inrintawkna sang zawk nen an inlan chhunzawm. Inkhel hmuhnawm takah hian goal a luh belh thei lawk lo thung a, Bayern hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual a, chak tumin an innawr tawn nasa hle. Boca Junior tan hian Miguel Merentiel chuan minute 66-naah goal thunin an si phurh a sut. Argentina club in goal an thun hian inkhel a tihmuhnawm zual sauh a, goal thun tuma an innawr tawn a hmuhnawm thei hle. Goal lut a awm belh mai theih loh hnu, hun tawp dawn hnaih minute 84-naah Michael Olise chuan Bayern Munich tan goal pawimawh zet mai a thun a, South American club lakah hnehna an chang zui ta hial a ni. Fifa Club World Cup khelh mekah European club ten South American club te an ngam lo viau a, Bayern Munich hi European club zingah CONMEBOL club hneh thei hmasa ber an ni zui ta a ni.
Group C a inkhel dangah Portugal club Benfica chuan an khingpui Aucland City chu 6-0 ngawtin an hneh a, point thum an hmu ve bawk. Benfica tan hian Ángel Di María leh Leandro Barreiro ten goal hnih ve ve an thun a, Vangelis Pavlidis leh Renato Sanches ten goal khat ve ve an thun bawk. Professional club pawh ni phak lo Auckland City hi Bayern Munich in 10-0 ngawtin an lo sawp tawh bawk a, khelh hnihah goal 16 ngawt an chhuah a, goal thun an la nei lo. Group C-ah hian khelh hnih atanga point 6 hmuin Bayern Munich an tlang chiang tawh a. Point li hmuin Benfica in pahnihna an luah a, point khat hmu tawh Boca Junior in last 16 luh beiseina an la nei a, Auckland City an tla chiang tawh thung.
Chelsea an tlawm
Zirtawp zana inkhel dangah English Club lian Chelsea chu Brazil club lian Flamengo lakah 3-1 in an tlawm a, Blues hi tla thei dinhmunah an ding.
Chelsea hian Flamengo lakah bul an tan tha a, Pedro Neto chuan minute 13-naah hmahruaina goal a thun nghal. Hma takah goal thunin phur viau mah se an khingpuite er let an dawl zo lova, goal thum ngawt an chhuah ta tlat tlung a, an tlawm daih.
Flamengo tan hian Bruno Henrique chuan minute 62-naah goal thunin an si phurh a sut a. An si phurh an sut atanga minute thum hnu lekah Danilo chuan hma an hruai letna goal a thun. Si phur zawk an nih hnuin Chelsea an talbuai zui a, minute 68-naah Nicolas Jackson hnawhchhuah a ni. Si phur zawk leh tlem zawk an nih vangin Chelsea tan chet a har tawh hle. Phur taka inlan Flamengo tan hian Wallace Yan chuan minute 83-naah an goal thumna a thun zui leh a, 3-1 in an chak zui ta a ni.
Group D-ah hian point ruk hmuin Flamengto in hma an hruai a, Chelse leh Esperance Sportive de Tunis ten point 3 ve ve an hmu mek.
Last 16 lut hmasa ber Bayern Munich
