Infiamna huanga chawimawina ngaihhlut hlawh 2024 Laureus World Sports Awards dawng thei tur nominee hrang hrang tarchhuah a ni a, hming lang zingah Erling Haaland, Katarina Johnson-Thompson leh Jude Bellingham hmuh tur an awm.
Manchester City chu team of the year dawng thei tura chhawpchhuah an nih bakah an striker Haaland pawh sportsman of the year nominee a ni.
Britain double heptathlon world champion Johnson-Thompson chu comeback of the year award dawng thei tura nominate a ni.
England leh Real Madrid midfielder Bellingham bakah Britain 1500m world champion Josh Kerr-te pawh breakthrough award shortlist zingah an tel.
Kum 23 mi Haaland hian a debut season-ah khan game 53 atangin goal 52 a thun a, a team thar chu Treble nihpuiin Premier League, FA Cup leh Champions League trophy a lakpui!
Nikuma sportsman of the year chawimawina dawngtu Argentina leh Inter Miami forward Lionel Messi pawh nominee zingah tel leh mah se Haaland hi a inrintawk hmel viau a, “Nikum zet kha chu kei leh team pumpui tan kum special ngawih ngawih a ni,” a ti.
Real Madrid a zawm hnuah kum 20 mi Bellingham chu Bernabeu club-a an goal khungtu langsar a ni chho nghal a; nikum nipui laia Borussia Dortmund atanga euro maktaduai 103 (£89m)-a an sengluh hnu khan tun season kal laiah hian a club thar tan game 29-ah goal 20 a thun tling der tawh!
British BMX rider kum 24 mi Beth Shriever pawh kum 2022-a a lo dawn tawh action sportsperson award dawng nawn leh thei tura nominate zingah telin, nikum khan Olympic lallukhum a lo khum tawh belhchhah turin world title a hlawhchhuak leh bawk a ni.
Laureus World Sports Awards nominee-te hi journalist leh broadcaster-te thlanchhuah niin, sporting legend rual awmna Laureus World Sports Academy lamin shortlist tarchhuahte atang hian lawmman dawngtu tur an thlangchhuak leh dawn a, April ni 22 khian Madrid khawpuiah award sem inkhawm buatsaih a ni ang.
Laureus World Sports Awards dawng thei tur an puang
