Lawngtlai-a raltlan biometric
enrolment kalpui dan thlirlet
Lawngtlai District Level Commitee on Myanmar Refugees chu an chairman, bawrhsap Donny Lalruatsanga hoin Zirtawpni khan an thukhawm.
Chairman chuan raltlan zinga ‘biometric enrolment’ neih chu sawrkarin a ngaipawimawh hle, tiin, an district-a an kalpui mekah khawl lama harsatna awm chu Home department-ah thlen a ni tawh a, khawl dang chah leh mek a ni tih a sawi. Internet connectivity that loh vangin khawl hman theih lohna hmun a awm a, hei hian harsatna a thlen tih a sawi bawk.
Sawrkar laipuia Ministry of Home Affairs thuchhuak angin, biometric enrolment neih hnuah chauh ‘identity card’ pekchhuah tur a ni a. Identification card pechhuak tura chak taka hma lak a ni tih bawrhsap hian a sawi a. A bikin village council tin chu mahni huamchhunga raltlante dik taka lo chhinchhiah tur leh tumah lo humhim lo turin a chah.
Thutkhawmah hian raltlan chungchanga sawrkar hmalakna tha an ti a, theihtawpa tawiawm zel nise an ti. Raltlante dik taka chhinchhiah an nih theihnan sawrkar, VC leh NGO inkarah thawhhona tha awm zel tura hma lak nise an ti.
‘Raltlante hi kan unaute an ni tih pawm tlangin, kawng hrang hrangah lo tanpui chhunzawm nise, chutih rualin, mumal taka chhinchhiah leh inkaihruaina tha zawk sawrkarin a siam chu tha taka zawm leh kalpui nise. A bikin Rakhine sumdawngte uluk zawka endik thin nise, raltlante hman ber ‘two wheeler’ khuahkhirhna tha zawk siam nise,’ an ti.
Tun dinhmunah Lawngtlai district-ah raltlan 2195 biometric enrollment laksak an ni tawh.
Lawngtlai-a raltlan biometric enrolment kalpui dan thlirlet
