Lawngtlai by pass road-a tlak dal siam a tha tawk lo

Lawngtlai by pass road-a
tlak dal siam a tha tawk lo
Lawngtlai by pass Road-a tlak dal (parapet) siam tha lo tak nawrchhiat a nih thu video thehdarh a nih chungchangah Ningani khan MJA Lawngtlai District chuan a hmunah thil awmdan an enfiah.
Thudawn danin, helai kawngpuia tlak dal siam chu a chhe hle a, kutlawng pawha kheuh thlak mai theih niin video darhah hian a lang a. Helai parapet, nawrchhiat nia darh hi MJA member-ten an tlawh lai chuan nawrliam vek a ni tawh a, nawrliam a nih hun hi Ningani zing lam nia hriat a ni. Thudawnna sawi danin, parapet siam tha lo nawrliam tak hi district bawrhsap thupeka tih nia sawi a ni.
By pass road-a parapet dang pawh hi rin ngam deuh tur awm bawk mah se, a tlangpuiin hmanraw tha lo, a nih dan tur anga hnathawh loh a tam zawk nia an hriat thu Lawngtlai MJA hian an saiw a. Thuneituten a rang lamin hma la se an duh tih an sawi.
Lawngtlai khawpui helna, a bikin lirthei liante tlanna tura ruahman by pass road siam hna hi 2020 November 20 atanga tan niin, kumin March-a zo thei tura beisei a ni a, NHIDCL hnuaia thawh a ni.
Lawngtlai AOC Veng-a Mizofed Filling Station atanga intanin, 71 RCC Camp bulah a chhuak a; National Highway 54 a pawh a, km. 5.8 a thui a ni. Mizofed Filling Station atangin KMMTTP Road hian km. 3.5 a zawh a, hetang hian kawngpui thar NH-54 pawh turin km. 2.27 sial niin, kawngpui zau zawng hi metre 12 a ni. Cheng vaibelchhe 31.14 senna tura ruahman a ni.
Bypass road hi zawhfel a nih hunah contractor-in kum 4 chhung a enkawl anga, chumi hnuah sawkar kuta hlan tur a ni.