Special Intensive Revision (SIR) 2026 kalpui mekah Lawngtlai district election officer, bawrhsap Donny Lalruatsanga kaihhruaiin Central YMA, Central YLA leh tlawmngai pawl dang bakah a kaihhnawih sawrkar aiawhte thukhawmin an inkawm.
DEO chuan SIR 2026 kalpui mekah electoral roll dik leh felfai tak nei turin theihtawp chhuah mek zel a ni tih a sawi a. Lawngtlai district chu ramdang, Myanmar leh Bangladesh nen ramri thui tak intawm a ni a, raltlan engemawzat an awm bakah Myanmar buaina avangin ramri-ah sumdawnna a kal reng bawk a, fimkhur a ngai hle tih a sawi. A bikin, electoral roll siam turah thawktute fimkhur tur an inchah nasa a, VC, NGOs leh kohhran nen pawh an thawkho tha tih a sawi a ni.
Telpuitu Lawngtlai East bialtu MLA, adviser to CM Dr Lorrain Lalpekliana Chinzah pawhin, claims and objection kalpui mekah fimkhur zual hun lai tak a ni, tiin, mawhphurhna neite fimkhur zual turin a chah. Central YMA leh Central YLA in SIR 2026 an ngaipawimawh chu fakawm a tih thu a sawi a. Electoral roll-a hming chuang theite chauh an chuan theihnan leh roll dik, felfai tha leh rintlak a awm theihnan theihtawp a chhuah tur thu sawiin, a bikin political oarty zawng zawngte thahnem ngai taka tawiawm turin a sawm tih a sawi a ni.
Central YMA assistant secretary SF David Ngursangzuala chuan, electoral roll siam mek chu Mizoram hmalam hun thuitak nghawng thei a nih angin fimkhur tlan a tul hle tih a sawi a. Central YMA chuan hming chuang thei lo tur an chuan palh a hlau hle tih sawiin, electoral roll buaipuitute chu dik taka hna thawk turin a chah a. Helam hawia Central YLA hmalakna chu Central YMA-in a thlawp tlat tih a sawi bawk.
Central YLA president F Lalrothanga pawhin, SIR 2026 kalpui mek leh hearing neih mekah dan kalha electoral roll-a luh tum awm theihna khua chu Central YLA chuan a thutchilh vek tih sawiin, YLA Branch-te pawh theihtawp chhuah turin an hriat tir tawh tih a sawi a ni.
Election officer Collin Hlychho chuan Lawngtlai district-a SIR 2026 kalpui dan tlangpui a sawizau a. July 4-a SIR 2026 draft electoral roll tlangzarh takah khan, roll-ah hian mi 90699 an awm a. Draft roll tlangzarh a nih hnuah insawifiah ngai (anomalies) ‘no map’ bikah Tuichawng bialah 567, Lawngtlai West bialah 2359 leh Lawngtlai East bialah 907 an awm a; “discrepancy” bikah Tuichawngah 14807, Lawngtlai West 8267 leh Lawngtlai East 5466 an awm a ni. A vaiin Lawngtlai district-a Assembly constituency pathumah ‘hearing’ tih (insawifiah) ngai mi 32373 an awm.
Draft electoral roll atanga a lan danin Lawngtlai district-ah hian vote nei mipa 45311 leh hmeichhia 45388, a vaiin vote nei 90699 an awm a. Tuichawng bialah 36300, Lawngtlai West bialah 29313 leh Lawngtlai East bialah 25086 an awm a; Assembly constituency pathumah hian service voter 223 an awm.
SIR 2026 kalpui hma hian Lawngtlai district-ah vote 95564 awmin, SIR 2026 draft roll-ah vote 90699 a awm a; vote paih 4865 a awm a ni.
Thutkhawmah hian zawhna awmte chhan a nih bakah sawifiah ngai sawifiah a ni a. 100% mapping nei Saikah ‘U’, Saikah ‘L’ leh Kawlchaw ‘W’ BLO te an tel bawk.
Lawngtlaia SIR draft roll hearing neih kaihhnawihah Central YMA aiawh kal
