Lawngtlai district magistrate Cheemala Siva Gopal Reddy chuan Bharatiya Nagarik Suraksha Sanhita (BNSS) in thuneihna a pek hmangin Lawngtlai district-ah tuialhthei khuahkhirhna thupek a chhuah. Hetihlai hian Lawngtlai district leh Siaha district-a tlawmngai pawl lian pahnih chu tuialhthei kal vel khuahkhirh chungchangah inbiak an tum.
Lawngtlai district-a filling station-te chu tuialhthei man bithliah aia sanga hralh chhuak lo turin district magistrate hian a ti a. Myanmar leh ramdangah sumdawnna kaihhnawihah tuialhthei pekchhuah a remti loa, Lawngtlai district-ah dan loa tuialhthei lei leh phurh luh a khap bawk. Thupek zawmlo chu dan anga hrem an nih tur thu a sawi a ni.
Hetihlai hian Central YLA chuan Myanmar-a tuialhthei thawnluh tur an dang zel dawn tih an sawi. Dan kalha Rakhine state-a tuialhthei lut tur an dan chu sawrkar tha tichak turin chhunzawm zel an tum a, an thiltih chu ramchhung mite inhrek tumna a ni lo tih an sawi nawn.
Lawngtlai district magistrate-in tuialhthei khuahkhirhna thupek a chhuah chu lawmawm an tih thu an sawi a. Ram pawna tuialhthei hralh chhuah chungchanga inhmuh thiam lohna awm nia langte chingfel turin Central YLA leh Mara Thyutlia Py Gen. Hqrs Siaha nen dawhkan kila inbiak thuai an tum tih Central YLA hruaitute chuan an sawi a ni.
Rakhine lam mi, Lawngtlaia tangkhangten an ram an pan theihnan YLA chuan ruahmanna a siam a. Ramdang nena tuialhthei ni lo, thildangah indawrna awmze nei zawka kalpui a nih theihnan an huamchhungah ruahmanna siam an tum tih an sawi bawk.
Lawngtlaiah tuialhthei khuahkhirh District pahnih NGO lian inbe dawn
