LC inthlan CM leh Revenue
minister-in an thutchilh reng
– MNF sr vice president
Tunhnaia Zemabawk West Local Council chu chief minister leh Revenue minister-in thutchilh reng bakah an intiamna atang chuan seat la vek awm tak an nih laiin an la vek lo chu a mak hle tih MNF hruaitu Dr R Lalthangliana chuan a sawi.
AMC inthlanpui atana Ningania Ward pali-a MNF hruaitute nen an inkawmnaah MNF senior vice president Dr R Lalthangliana MLA chuan, ZPM kum hnih leh a chanve dawn sawrkara thil thleng danglam tak chu, an sawrkarna hnuaia inthlan awmah an tla deuh zel tih a sawi a. MNF leh Congress sawrkar laiin village council /local council leh inthlan hrang hrangah sawrkar lai party chuan zaa 70 chin emaw a aia sang an la zel, tiin, Covid lai khan MNF chuan local council 85 awmah 78 an la tih a sawi.
ZPM sawrkar hlimah Sinlung Hills Council inthlanah MNF a sawrkar a, VC leh LC term an duh danin thla 6 pawhtawi sakina, chance nei tha an intih lai berin an inthlang a, zaa 50 pawh ZPM-in an la tling mumal lo tih a sawi. “Dampa by-election result kan hria a, Phunchawng LC seat 5 awmah seat 4 MNF-in kan la a, nikum kumtawpah LADC-ah MNF-in seat kan la tam ber a, ZPM chu pathumna an ni. Tunhnaiah Zemabawk West Local Council thar an siam a, vote pawh 900 chuang vel chauh awmnaah chhungkaw 100 zet in hmun tihfelsak tiamin CM leh Revenue minister-in an thutchilh reng a, hengah hi chuan ZPM chu an vaia tlin vek awm tak, party dang pawhin chuh loh law law na tham a ni a, an solid lo kha mipui mak tih a hlawh hle,” a ti.
LC inthlan CM leh Revenue minister-in an thutchilh reng – MNF sr vice president
