Mahmuaka Chhakchhuak
Pu PL. Liandinga hming ka hriatna hi kum sawmthum dawn lai a ni tawh awm e, chu ka hriatna chhan chu a zirna leh sorkar hna a thawhna lam vang a ni hauh lo a, lehkha ziaktu a nihna vang a ni. Chutiang bawkin Pute; B. Lalthangliana, R. Lallianzuala leh Lalrammawia Ngente-te pawh lehkha ziaktu an nihna atanga ka hriatte an ni a, an eizawnna leh hnathawh lam erawh chuti takin ka lo hre lem lo thung. Anni rual aia u deuh hlek Pute; J. Malsawma, R. Lalrawna leh Lalzuia Colney-te pawh an hnathawh leh eizawnna lam chanchin sawi tura ka hriatna a tawi riau laiin an lehkha ziak lam erawh thui deuh hlek zawka sawi tur ka hriain chu lam chu anmahni ka dah chungnunna ber pawh a ni.
Lehkha ziaktute hlutna hi sawi kim sen a ni kher lo ang a, helai hmun atang ringawt hi chuan sawi vek sen pawh a ni lo ang. Ram leh hnam tana an hlutna lam hawi phei chu sawi tur tam tak a awm thei ang a, khawtlang leh chhungkua leh mimal nuna an hlutna zawng zawng pawh ziak vek dawn ila phek tam tak daih tur a ni thei ang. Kan mi hmasate, a bik takin mual min liamsan tawhtute zingah ngei pawh lehkha ziaktute hi kan hlut bik an ni em tih tur a ni a, hriatreng an hlawh bik bawk nia hriat a ni. KC. Lalvunga ngei pawh IFS niin mi chhuanawm tak a ni nain a lehkha ziak vang zawk a hriat lar a ni tiin sawi ila kan sawi sual kher awm lo e. C. |huamluaia, Kaphleia, K. Zawla, JF. Laldailova, A. Thanglura, L. Keivom, James Dokhuma, R. Vanlawma te ngei pawh hi an lehkha ziak avanga hriat hlawh an ni a, lehkha ziak lamah sulhnu nei ta lo sela heti taka hriat lar hi an ni kher lo mai thei e.
Tlem lai khan kan mi ropui leh chhuanawm tak mi pakhat chu an inah lengin zan dar 12 thleng dawn hian kan inkawm a, a chanchin min hrilh chu ngaihnawm tham a niin chhinchhiah tlak tak tak pawh a awm a, ziak a chhinchhiah tura ka sawi chuan lehkha ziah hi ka thiam lo, mahni chanchin ziah lam phei chu ka ti ngai lo hrim hrim a, tul an tih leh kan fate’n an la rawn ziak anga a ni mai a ti a, amah ngeiin han ziak sela ka duh ngawt mai. Amah ang bawk hian mi ropui tak pakhat pawhin lehkha ziak hi ti ngai loa a inhriat tlat avangin a chanchin (Autobiography) a ziak hreh tlat mai bawk a. Nia, lehkha ziak hi ti ngai lo tan chuan huphurhawm tak a ni a, ziak aia sawi lam talent zawka inhre tlat hi mi tam tak kan awm a, ziak ve lem lo tam takte lah hian ziaktute ziah dan hi an lo sawisel taihma viau thin bawk a.
Lehkha ziaktute hi khawvelah hian an dinhmun a hniam tak tak thei ngai lo a, kan hriat theih chinah ngei pawh hian dahhniam tumin sorkar tha ngei pawh hmang viau thin mahsela rahbeh hlen tak tak theih an ni ngai chuang hek lo. An pawimawhna hi sawi tur tam tak a awm thei ang a; Chanchin hlui leh hnam kalphung humhalhna tha tak a ni a, mipui ngaihdan leh thlirna thlakthleng theitu pawimawh tak an ni bawkin tunlaia thilthleng ngei pawh mipui hnena hrilhfiahtu mi pawimawh tak an ni bawk. Heng bakah hian chhiar tute fuihna leh phurna pe theitu an niin hlutna tam tak an nei a. Entirna atan William Shakespeare (1564-1616) kha han sawi ila; English ziaktu ropui ber pawla ngaih a niin a kutchhuakte hi vawiin thleng pawha dah chungnun a ni a. A kutchhuak zingah Henry V leh Richard III te chu history leh culture humhalhna tha tak a ni a, Romeo and Juliet leh The Merchant of Venice te chu Politics, hmangaihna leh khawtlang thila mipui ngaihdan siam theitu tur thu lam hawi a ni lehin A play and Sonnet-te chuan hun kal tawh hmanga hlimna min thlenin Hamlet leh Macbeth chuan mihring nihphung leh rilru lam hriatna thukzawk min neih tir thei bawk. Hetiang hian a thawnthu ziah dangte ngei pawh vawiin thlenga thukna tam tak nei a niin phawrhchhuah tur thil tam tak paite an la ni hlawm.
Shakespeare ang bawkin hmanlai greek hla phuah thiam Homer te, Rom hla phuah thiam Virgil te, English Novelist Jane Austen leh Charles Dickens te, Martin Luther King Jr thlengin mihring chanchin, nunphung leh khawtlang nunah chhinchhiah tur thu tam tak min hnutchhiah a, an kutchhuakte chu dah chungnung ala ni reng bawk. Anni ang hian mizo ziakmi zingah ngei pawh an kutchhuak hlut bik hi kan nei nual a; Thu leh hla lamah Siamkima Khawlhring ziak ZALENNA RAM chuan hmahruaitu nih a tling a, History lamah B. Lalthangliana kutchhuakte hian hmun lailum ala luah reng a, Politics lamah ngei pawh A. Thanglura kutchhuak Zoram Politics Inlumlet dan chu chhiar hmaih rual loh a ni bawk. Lehkhabu dangte pawh thurchhuah tur a awm nual tho nain heti chinah pawh hian lehkha ziaktute hlutna chu kan hrethiam tho awm e.
Lehkha ziaktute hlutna hi hnam changkang zawkte chuan an lo hriain an damlai ngei ngei pawh hian an chawimawi thiam a. An boral phei chuan mi dang zawng aia ropuiin an sun emaw tih mai tur a ni bawk thin. Kan ramah ngei pawh hian an boral hnua an puala hun hman zingah lehkha ziaktute hi an puala hun hman tam ber an niin a rinawm a, ram leh hnam tana an hlutna hi thang lo thar zelte hian kan hre chho zel dawn pawh a ni mai thei e. Chutih ruala sawi nuam lo tak awm erawh chu an kutchhuak lehkhabute hi beisei aiin midangte hian kan hlutpui lo a tih theih ang. Vawiin thlengin lehkha ziaktute zingah mahni kutchhuak lehkhabu zuar hi hmuh tur an la awm reng a, harsa taka lekhabu khawrpum ve si a, a hralhna lama harsatna nei hi chhiar tham fe an la awm reng hi a zia lo ngawt mai. Hei hi chik taka ngaihtuah lem loh pawhin lehkha chhiar lama kan thatchhiat vang a ni tih a rintheih mai a, sum leh pai neih loh vang hi chu a rinawm chiah lem loh.
Ziaktute hian thu tha leh ropui tak tak an ziak vek hauh lo ang, a ziaktu awmchhun mi tlemte ziak erawh hi chu kan hlut a tha hle mai a, eng lam hawi pawh nisela ram leh hnam tana thil hlu leh mi zawng zawngin kan theih leh thiam hauh loh tur ziaktute an ni tih hrerengin an kutchhuakte kan hlutpui hi kan bat ve a ni.