Lehkha zir zawhah exercise la rawh
I zirlai bye-heart sa i theihnghilh leh thuai thin em? I hre rei thei lo va, zir that leh fo a ngai a nih chuan lehkha i zir zawh atanga darkar li velah exercise la thin rawh, chu chuan kan thil zir thiam sa hriat rei theihna kawngah kan thluak a tichak thei niin mithiam ten an sawi.
Radbound University, Netherlands-a mithiam Guillen Fernandez leh a ho ten zirchianna neiin, zirlai zingah lehkha an zir atanga darkar li vel a exercise la te chu exercise la ve lo leh zir zawh veleha exercise la te aiin an thil zir chu an rilru-ah a bet nghet zawk tih an hmuchhuak.
Guillen chuan, “Kan thil zir thiam sa chu kan thiam ngheh theih nan sports a pawimawh tih kan hrechhuak ta a, mahse, exercise lak chu a hun a pawimawh a, zirzawh hlima lak aiin zir zawh atanga darkar li vela lak a tha ber,” a ti.
He zirchiannaah hian zirlai 72 te chu thlalak chi hrang hrang 90, minute 40 chhung an zirchian tir a, chumi hnuah group thumah an then hrang a, group khat chuan an zir zawh veleh exercise an la nghal a, group hnihna chuan darkar 4 hnuah exercise an la a, group thumna chuan exercise an la ve lo. Tichuan, ni hnih hnuah an thil zir te chu an test leh ta a ni.
He zirchianna chungchang hi journal Current Biology-ah tarlan a ni.
Lehkha zir zawhah exercise la rawh
