Lehkhabu chhiar…

Mizoram Youth Commission hmalakna thar ‘Promotion of Reading Culture among Mizo Youth’ leh ‘MYC Book Club’ chu nimin khan tlangzarh a ni a. Hei hian a tum ber chu nuam ti taka \halaiten lehkhabu an chhiar theihnan a ni.
Awlsam zawk leh rang zawka thil hriat zung zung theihna a nih avang hian mipui a mimir pawh hian lehkhabu chhiar aiin social media hi kan tuipui zawk ta ti ila, kan sawi sual awm lo ve. Zirlaite zingah pawh, social media buaipui nasat avanga zirna lama tlakhniam phah an tam.
Tunhmaa lehkhabu chhiar a\anga hriatna leh thiamna nghet leh thuk zawk neih ang kha, tun lai zirlaite hian an nei pha ta lo tiin a sawi theih bawk awm e. A chhan chu, an zirlai kaihhnawih eng emaw hriat mamawh a lo awmin, lehkhabu rawn lova internet search engine an rawn \hin vang a ni. Thumal pahnih khat han chhut zeuh a, rang tak leh awlsam zawka a chhanna han phawrh chhuah mai theih a nih tak avangin, lehkhabu chhiar a\anga hriatna tihpun lam kha rilruah a awm tawh lo.
Social media-a kan innghah hian, hriatna a tluantling lo a, hriatna a chhumbung a, mobile phone battery a ral rualin kan hriatna pawh a ral ve nghal mai \hin.
Lehkhabu chhiar a\anga hriatna leh thiamna peipungte erawh chu, hmanrua (device)-ah an innghat ve lova, khawi hmunah pawh, ruahpui vanawn a sur emaw, ni a sa emaw, thimthamah a ni emaw, ramhnuaiah a ni emaw, khawpuiah a ni emaw, eng lai pawhin, khawi hmunah pawh an thiamna leh hriatnate phawrh chhuah tur an nei bik \hin a ni.
Heta \ang hian, lehkhabu chhiar \hinte quality leh, lehkhabu chhiar ngai lo, social media rinchhante quality chu a inthlau hle tih a lang a ni.
Zirna inah zirtirtuten lehkhabu chhiar uar turin zirlaite fuih sela, in lama lehkhabu chhiar tur leh chhiar hun chhung tur bituk se, chu chu nu leh paten in lamah lo vil ve bawk se, chutianga kan tih theih chuan, zirlaiten lehkhabu ngainatna an neih leh theih phah a rinawm.