Sawrkar leiba (committed liability), detail project reports felfai zawk, GST lakkhawm dan chak zawk leh a kaihhnawih zirchiangtu adviser to chief minister (Finance) TBC Lalvenchhunga MLA kaihhruai Study Team chuan Ningani khan an rawtna chief minister hmaah an sawifiah.
Chief minister chuan Study Team thawhrimna a fak a, an rawtna hian kalphung thar tha zawk a pe dawn, tiin, “Eirukna a veng dawn a, GST lakkhawm lamah min pui dawn a, hmasawnna hnathawh a chak sawt dawn bawk. Hman theiha peih thuai a ngai a ni,” a ti.
Department leiba (committed liability) chu khuarei thil an lo ni a. Tuna a awm tawhsa chu Study Team rawtna angin an kalpui anga, a awm leh tur chu an veng tawh dawn tih a sawi bawk.
Study Team chairman hian report a pe a. An rawtnate hi pawm vek a ni. Study Team hian hmasawnna hnathawhna leh GST lakkhawm kawngah rawtna, DPR siam dan inang tlang neih dan tur, PWD SOR ennawn leh rawtna dang engemawzat a nei a. A taka hman theiha peih thuai tum a ni.
Thutkhawmah hian P&E minister F Rodingliana, PHE minister Prof. Lalnilawma leh Planning & Finance commissioner Vanlaldina Fanai bakah works department hotute, Taxation department hotute an tel.
Study Team rawtna:
8 Leiba rulh ngai hi a tahtawl (phase wise) a rulh an rawt.
8 PWD-in cheng vaibelchhe 5.83 ala nei a, sawrkar kum kal meka tihfel an rawt. P&E department-ah vbch. 12.62 a awm a, sawrkar kum hnih chhunga rulh an rawt a; PHED ah vbch. 58.07 a awm a, sawrkar kum thum chhunga rulh an rawt.
8 Heng hna thawktute hian GST an tifel ngei ngei tur a ni anga, works department pathumin leiba an la neih hi GST hman hnu ami vek an ni.
8 Hetiang leiba tang hi a awm zui tawh lohna atan hmalak dan tur an duang a. Emergency works thawh a tul a nih pawhin phalna lak zel tawh tur a ni ang.
Leiba rulh dan tur leh chak zawka GST lak dan turah rawtna thlen
