Leibat engto loah CM puh
PC party leh BJP chuan chief minister-in state sawrkarin lei a bat sawinep leh engto lo zawnga a sawi chu tha lo an tih thu an sawi.
PC president Vanlalruata chuan thuchah siamin, ram sum dinhmun tha lo zual zel chu politician leh a mawhphurtu sawrkar hnathawkten manganpuiin mutmawh hnarmawhah neih a, sawrkar hnathawkten hlawh a huna an la hleithei lo leh sum lengvak tlem avanga mipui harsatna chu sutkian a ngai tih a sawi a. Chumi atana mawhphurtu lian ber chu chief minister, a dawttu chu Finance minister a ni, tiin, CM leh finance minister chu mi pakhatin a chelhkawp avangin a chelhtu mawhphurhna a lian zual hle tih a sawi bawk.
‘A mawhphurtu ni lo te pawhin kan manganpui tawh laiin, a mawhphurtu berin vei hauh lo leh sawinep zawnga a che thin hi a demawm takzet,” a ti.
State leiba chu tunlai khawvela sawrkar leiba teh dan anga teh chuan, India rama ba hnem ber kan ni tih PC president hian a sawi a. Hei aia la mangan thlak chu, sawrkar dinhmuna leiba rulhna tur puk ngai khawpa kan awm tawh hi a ni tih a sawi. ‘He kan dinhmun tha lo hi sawinep tuma dam thei ni loin, tumna tak tak nena siamthat ngai a ni zawk. A siamthat theih dan a awm a, siamthat ngei a ngai. PC Party chuan a siamthat theih dan kan hria a, siamtha theia thuneihna pe turin mipui kan ngen a ni,” a ti.
BJP Mizoram Thalai pawhin thuchhuah siamin, chief minister berin state leibat a engto lo chu a makin, Mizoramin hetiang CM kan nei chu India ram state-a state vanduai ber kan ni a a ngaih thu a sawi.
‘Mahni department chan pawh enkawl fel hleithei lo, a hnathawkte hlawh tur puk chawpa pek reng ngai CM hian zah nachang a hre lo anih pawhin, a sum puk tuartu mipui tal zah ve se. Mahni leibat a engto loh thu leh hlim tak leh thawveng taka ala sawi ngam hian Mizoram mipui kan vanduai zia a tilang chiang hle,’ a ti.
Mizorama sawrkar mekte kal dan chu sawrkar tum tawh lo chet dan ni bera an ngaih thu BJP Thalai hian sawiin, BJP sawrkarna state-ah sawrkar tha a awm zel thin avangin, 2023 MLA inthlanah BJP sawrkar tir chhin turin mipui an sawm tih a sawi a ni.
Leibat engto loah CM puh
![](https://theaizawlpost.org/wp-content/uploads/tap_logo-min-large.jpg)