Kumin 2025 chhung hian dan lova sumdawnna atana hman tur leitha Urea Bag 5,424 leh DAP bag 300 (a vaiin bag 5,724) zet man chhuah a nih thu agriculture minister chuan tun hnai khan sawi chhuak a. District hrang hranga Fertilizer Inspector, Police leh Magistrate-te nen tangkawpin, heng dan lova leitha thawnchhuak thinte uluk taka vil reng a nih thu a sawi bawk.
Mizorama thlai chinna ram zau zawng mil leh thlai chinna leilunga thlai chaw awm zat (soil fertility) chu Mizoram sawrkar chuan sawrkar laipuiah report a theh lut thin a, chumi mil chuan leitha hi sawrkar laipui chuan Mizoram quota a lo siam thin niawm tak a ni. Thlai chingtuten man man zawka heng leitha te hi an lei theih nan India sawrkar chuan fertilizer siamtu company-te hi a siam man 90% vel a tumsak thin a. Entirnan: Company-in leitha kg 1 siam chhuah nan Rs 100 hmang ta se, packaging leh a kaihhnawih neuh neuh (tax hrang hrang) senso te nen, loneitute hnena leitha Kg 1 a hralh chhuah theihna chu Rs 120 vel a lo ni dawn ta tihna a ni. Mahse, sawrkar laipuiin fertilizer siam chhuahna senso atanga 90% a tumsak avangin, Company chuan leitha Kg 1 hi alo berah Rs 30 vel lekin thlai chingtute hnenah a hralh chhuak thei dawn ta tihna a ni awm e.
Hetiang taka sawrkar laipuiin thlai chingtute hamthatna tur a ruahman lai hian, Mizoramah chuan fertilizer dealer-ten thlai chingtute hnena leitha thleng tur chu dan kalhin a rukin man man zawkin hmun dangah an lo hralh ru hiau hiau mai thin tihna a ni a. Hei hian thlai chingtute thlai tharchhuah tam leh tlem a hril thui em em a, thlai chingtute hlawkna tur a pelhe nasa a, state dang thlai, a thianghlim leh thianghlim loh hriat hleih theih tawh loh kan chawkluh teuh teuh phah tihna pawh a ni thei nghal ang a, leitha tihchingpen hian a nghawng thui em em a ni.
Mizoram chhunga fertilizer dealer ten leitha an thehthang dan hi awlsam tea hriat mai theih a ni a, thuneitu lamin an bawhzui that a, an tum phawt chuan, dan kalha leitha put ru tur hi harsa lo tea dan theih niin a lang.
Lei\ha tihchingpen leh loneitute
