Thingtlang kuthnathawktute zingah leilung leh lei chunglang tha kal ral lo zawnga thlai leh thei thlan bik ching tura hmalakna – Contour Hedgerow Farming kalpui mekte hnenah Environment Forest & Climate Change department chuan tanpuina a hlan.
Inrinnnia Aizawl Forest Division-in Tamdila Contour Hedgerow Farming Programme a buatsaih hi Assembly speaker Lalbiakzama chuan a hmanpui a. Contour Hedgerow Farming hnuaia hma latu mi 106 hnenah tanpuina hlan a ni.
Mizoram chu tlang ram a nih avangin leilung a luangral chak a, lei tha a inchhekkhawm leh har avangin ram rem leh phaizawl aiin a let tam takin humhalh a hautak zawk a, khuanu (mother earth) awm dan mila khawsak her rem tur zawk kan ni tih Lalbiakzama hian a sawi. Kan thlah lo la awm zel turte tana leilung humhalh chu kan tih makmawh a ni tih a sawi bawk.
Lei tha kalral lo thei ang bera leilung hman tangkai leh chu mihring leh nungchate dam khawchhuahna atana tih makmawh a ni, tiin, “Mihringte nunna atan chaw thar chhuahna turin leilung hi kan mamawh a ni,” a ti.
Ramngaw leh lei chunglang hang tha humhalh turin a buaipui department tha chakna ringawt a tawk zo loa, mi zawng zawng kan pawimawh tih Assembly speaker hian a sawi a. A bikin huan Io ram neitute an pawimawh a, Integrated Management Plan of Tamdil Wetlands hnuaia thlan tawh chhungkaw 318 leh la thlan tur, a vaiin chhungkaw 530 ten a nihna ang taka an kalpui chuan leilung humhalh leh thlai thar hlawk kawngah Saitual leh a chhehvel nghawng tham a ni dawn tih a sawi a ni.
Tamdil Wetland Monitoring Committee hnuaiah hian Saitual, Sihfa, Tualbung leh Dilkhan khua awmin, an ni hian balhla leh lakhuihthei an ching a. Hei bakah hian Tamdil Integrated Management Plan hnuaiah farm based & skill based microenterprises atangin chhungkaw 150-in tanpuina an dawng tawh a ni.
Leilung luang ral tam lo zawnga eizawngtute pui
