Mizoram Disaster Management & Rehabilitation minister Prof. Lalnilawma chu October 16 khan New Delhi Mizoram House-ah NBCC (India) Limited chairman leh managing director Dr KP Mahadevaswamy nen an inkawm a; leimin laka invenna leh chhiatrupna dawl zo ruhrel din leh siamthat kawnga thawhho dan tur an sawi.
Mizoramah, a bikin fur laia lei min thin chuan mihring nunna, kawngpui, hmunhma leh building, chenna hmun leh inkalpawhna a tichhe nasa thin hle tih minister hian a sawi a. Leimin laka inveng thei turin science thiamna hmanga zirchian a tul, tiin, hun lo la kal zel turah lirnghing leh chhiatna thleng thei thlir lawka hma lak a tul tih a sawi.
“Chhiatna thlen hnua siam thar tum ai chuan, inven lawk dan ngaihtuah a, inbuatsaihna tha tak kalpui a tul a. Mihring nunna leh infrastructure pawimawh humhim chu state-in a ngaipawimawh a ni,” a ti.
NBCC (National Buildings Construction Corporation) technical leh engineering lam thiamna hmangin leimin theihna hmun hriat chian (landslide hazard mapping), geology leh geotechnical survey, leilung dinhmun leh lei ngheh zawng zirchian, leimin hlauhawmna hmun thlan chhuah leh a hmachhawn dan tur ruahmanna siam a sawipui a ni.
Mizoram tlang ram dinhmun mil tura engineering leh technology thar hman theih dan pawh an sawi a. Retaining wall siam, gabion wall siam, soil nailing, rock bolting, slope stabilisation leh tuihawk luanna tha zawk siam pawh a tel.
National Landslide Risk Mitigation Programme chu an ngaihpawimawh zingah a tel a. He Programme hnuaiah hian hmalakna hmasa atan dinhmun derthawnga ding, leimin hlauhawmna hmun nia lang ngaihpawimawh hmasak nise, an ti.
DM&R secretary Sushil Singh chuan Mizoram dinhmun tlangpui, hma an lak mekna, harsatna tawh leh chhiatna thleng thei laka inbuatsaihna kawnga Mizoram sawrkar hmalakna a sawi a. NBCC director (Commercial) Dr Suman Kumar bakah hotu dang an tel a. Technical leh engineering lama thawhho dan tur tha ber nia an hriat an sawi a ni.
Leimin tih tlemna’n a ven dan tur sawipui
