May ni 28-a Hlimen-a leimin tuartu chhungkuate an mangang a, relief camp-a luh thuai thuai an duh chungin sum harsatna avangin relief camp sak hna a muang si. Sorkar atangin relief camp sakna tur sum hmuh a la awm lo a, CM relief fund atanga sum an hmuh bak sorkar atangin tanpuina a la lut lo tih thu dawn a ni.
Hlimen atanga thu dawn danin, July ni 1-ah khan CM relief fund atangin buhfai man tur Rs 4,68,000 an dawng a, chhungkaw 75-a mi 312-te hnenah mi pakhat tan Rs 1500 theuhva sem a ni.
CM relief fund atanga sum an hmuh bak sorkar atangin leimin tuarte puihna tur sum a la lut lo a, relief camp sakna tur sum pawh an la hmu lo.
Vanduaina thlen hlimah khan thuneitu lamin ni khatah Rs 263, chhungkaw tinah mi pahnih zel tan thla hnih chhung pek a ni ang tiin an sawi a, hei pawh hi thla khat chuang liam hnuah pawh leimin tuarte’n an la hmu lo, YMA hruaitute’n an ti.
Local Council leh YMA tang dunin Hlimen-a Central Workshop hmunah relief camp an sa a, sorkar atangin sum hmu lo mah se a bain an sa a ni. June ni 22 khan chhungkaw 10 an lut a, July ni 2-ah chhungkaw 10 an lut leh. Chhungkaw 19-te awmna tur sak a la ngai a, mahse sum harsatna avangin an sa leh thei dawn em tih an hriat loh thu khawtlang hruaitute chuan an sawi.
Mahni in chhuahsantute an mangang tih an sawi a, chhungte leh thenrualte an bel a, chhungkaw khat pawh in hnihah te an insem darh a, chaw ei kual te an awm tih te an sawi. Pastor quarters leh upa ina lut te pawh an awm tih an sawi a, chhungkaw pakhat phei chu an mangan avangin June ni 30 (Chawlhni) zan khan a hlauhawm avanga chhuahsan tawh in, mi dang inah an lo riak tih te an sawi.
“Camp-a luh thuai thuai hi an duh hlawm a, an mamawh bawk a. Kan sa chak thei si lo a, a inthlahrunawm khawp mai,” YMA hruaitu pakhat chuan a ti a, “Sum a awm lo a, sorkar atangin kan dawng lo a, a bain kan sa ringawt mai a, tihngaihna dang a awm si lo a,” a ti bawk.
Sorkar thuneitute’n a tir lamah relief camp sak nan cheng nuai 6 pek a ni ang tih an sawi kha vawiin thlengin an la dawng lo tih an sawi a, an sawi danin, June ni 24 khan DM&R minister an hmu a, ‘Lo sa zel rawh u, sum pawh in rawn la dawn a nia,’ a ti a, June ni 28-ah an ngaihven a, sum a awm loh thuin an lo chhang a ni. ‘Phone-in kan rawn hrilh mai ang che u,’ an ti a, chu chu an nghak ta tawp mai tih an sawi.
Chhungkaw 10 awmna tur cheng nuai 12 sengin an sa phawt a, chhungkaw 10 dang awmna tur cheng nuai 10 vel sengin an sa leh. Sorkar thu zawma sa an nih thu leh senso tur te pawh an hriat thu sawiin YMA hruaitute chuan cheng nuai 44 senga in hi sak tum a nih thu an sawi.
Sorkar thu-a saah an inngai tih an sawi a, sorkar thu hmu an nih avangin a bain hna an thawk tih sawiin, vawiin thlengin sorkar atangin sum dawn a la awm si lo a, a ba-a chhunzawm zel an huphurh tih an sawi. Chutih rual chuan mahni in chhuahsantute’n awmna tur an mamawh si a, chhunzawm loh an ngam lo a, chhunzawm an ngam bawk si lo a, lai takin an awm tih an sawi bawk.
“In hi sak chhunzawm ngei kan duh, a tulin a tul. Mahse sum a awm lo a, kan buai ta a ni. A ba bawka han sak leh mai tur nge ni dawn?” YMA hruaitu pakhat chuan a ti.
Leimin tuartu chhungkuate mangang CM Relief Fund bak tanpuina la dawng lo
